జె.ఎన్.యు. విద్యార్ధి కన్నయ్య కుమార్ తీహార్ జైలు నుండి నిన్న విడుదలయిన తరువాత యూనివర్సిటీ ప్రాంగణంలో విద్యార్ధులు నిర్వహించిన ఒక బహిరంగ సభలో చాలా ఉద్వేగభరితంగా ప్రసంగించారు. సుమారు 50వేల మందికి పైగా విద్యార్ధులు, ప్రజలు హాజరయిన ఆ సభలో ఆయన ప్రసంగిస్తూ “మేము భారత్ నుంచి మాకు స్వాతంత్ర్యం కావాలని కోరుకోవడం లేదు. ఈ దేశంలో మాకు స్వేచ్చ కావాలని కోరుకోన్నాము. ఈ దేశాన్ని దోచుకుతింటున్న వారి నుండి మాకు స్వేచ్చ కావాలని కోరుకోన్నాము. దారిద్యం నుండి విముక్తి కావాలని కోరుకొన్నాము,” అని చెప్పారు.
“నేను జైల్లో ఉన్నప్పుడు ఒక పోలీస్ కానిస్టేబుల్ ని కలిసాను. అతను కూడా పి.హెచ్.డి చేయాలనుకొన్నాడుట కానీ అతని వద్ద ఆ చదువు ‘కొనడానికి’ లక్షలు లేకపోవడంతో ఆ ఆలోచన విరమించుకోవలసి వచ్చిందని చెప్పాడు. కనుక అటువంటి దారిద్ర్యం నుండి దేశ ప్రజలను విముక్తిని మేము కోరుకొంటున్నాము తప్ప దేశం నుంచి కాదు. ప్రధాని నరేంద్ర మోడి ‘సత్యమేవ జయతే’ అని చెప్పారు. దానిని నేను అంగీకరిస్తున్నాను. ఎందుకంటే అది ఈ దేశానిది. ప్రజలందరిదీ. ప్రధాని మోడి రేడియోలో ‘మన్ కి బాత్’ (మనసులో మాట) అనే కార్యక్రమంలో ప్రజలతో మాట్లాడుతుంటారు. కానీ ఆయన ప్రజల మాటను వినాలనుకోరు. అటువంటప్పుడు నాకు ఆయనని హిట్లర్ గురించి మాట్లాడమని అడగాలనిపిస్తుంటుంది లేదా పాక్ నియంత పర్వేజ్ ముషరఫ్ గురించి మాట్లాడమని చెప్పాలనిపిస్తుంటుంది,” అని కన్నయ్య కుమార్ అన్నారు.
“మన తల్లితండ్రులతో బలమయిన అనుబంధం కలిగి ఉండటం ఎంత అవసరమో నాకు జైల్లో ఉన్నప్పుడు తెలిసి వచ్చింది. కనుక విద్యార్ధులు అందరినీ కూడా తమ తల్లి తండ్రులతో అనుబంధం బలపరుచుకోమని నేను విజ్ఞప్తి చేస్తున్నాను. దేశ వ్యాప్తంగా ప్రజలు నాకు మద్దతు ఇచ్చినందుకు అందరికీ నా కృతజ్ఞతలు. నా అనుభవాలను, ఆలోచనలను దేశ ప్రజలందరితో పంచుకొంటాను. అలాగే నేను నా స్వగ్రామానికి వెళ్లి అక్కడ దళితులు, నిరుపేదలతో నా ఆలోచనలు పంచుకొంటాను. దేశంలో ఇటువంటి అణిచివేత చాలా కాలంగా సాగుతోంది. దేశంలో 69 శాతం మంది ప్రజలు ఇటువంటి అణచివేత ధోరణిని వ్యతిరేకిస్తున్నారు. కానీ వారిలో కేవలం 31 శాతం మంది మాత్రమే మాయ మాటలు నమ్మి ఓటు వేశారు,”అని కుమార్ చెప్పారు.
“దేశద్రోహులపైనే కేసులు నమోదు చేస్తున్నామని ప్రభుత్వం చెపుతుంది కానీ కేజ్రీవాల్, సీతారం ఏచూరి వంటివారిని అభిమానించే వారిపై కూడా కేసులు నమోదు చేస్తున్నారు. ప్రభుత్వాన్ని ప్రశ్నించిన వారిపై దేశద్రోహులు ముద్రవేసి కేసులు నమోదు చేస్తున్నారు. ఆ విధంగా విద్యార్ధులను అణచివేయాలని ప్రభుత్వం ఎంతగా ప్రయత్నిస్తే వాళ్ళు అంతగా ప్రతిఘటిస్తారు. కనుక వారిని అణచివేయడం సాధ్యం కాదని ప్రభుత్వం గుర్తిస్తే మంచిది. యూనివర్సిటీ ఆఫ్ హైదరాబాద్ విద్యార్ధి రోహిత్ వేముల కోసం మనం పోరాటం మొదలుపెట్టాము. ఇప్పుడు జె.ఎన్.యు.లో కూడా మరో పోరాటం మొదలుపెట్టాము. ఒత్తిళ్లకు లొంగకుండా ఇకపై మన పోరాటం కొనసాగుతుంది,” అని కుమార్ చెప్పారు.
“జైలు నుండి విడుదలయిన తరువాత మళ్ళీ స్వేచ్చ కోరుతూ నినాదం చేస్తావా? అని ఎవరో నన్ను అడిగారు. అవును తప్పకుండా మళ్ళీ నినదిస్తాను. మాకు ఈ అణచివేత నుండి, దోపిడీ నుంచి, దారిద్ర్యం నుంచి స్వేచ్చ కావాలి,” అని నినదిస్తూ కన్నయ కుమార్ తన ప్రసంగం ముగించారు.
