పాన్ ఇండియా మార్కెట్ ఇచ్చిన ధైర్యంతో మీడియం రేంజ్ హీరోల సినిమాల బడ్జెట్ల‌కూ రెక్క‌లొచ్చేశాయి. నిన్నా మొన్న‌టి వ‌ర‌కూ రూ.30, రూ.40 కోట్ల మ‌ధ్య తిరిగిన హీరోలంతా ఇప్పుడు వంద కోట్ల మార్క్ కు చేరుకొంటున్నాయి. తాజాగా సాయిధ‌ర‌మ్ తేజ్ సినిమా బ‌డ్జెట్ కూడా సెంచ‌రీ దాటేసింది.
సాయిధ‌ర‌మ్ తేజ్ హీరోగా రోహిత్ కె.పి. ద‌ర్శ‌క‌త్వంలో ఇటీవ‌ల ఓ సినిమా ప‌ట్టాలెక్కిన సంగ‌తి తెలిసిందే. పాన్ ఇండియా స్థాయిలో రూపొందిస్తున్న ఈ చిత్రాన్ని ‘హ‌నుమాన్‌’ ఫేమ్ కె.నిరంజ‌న్ రెడ్డి ప్రైమ్ షో ఎంటర్‌టైన్‌మెంట్స్ తో క‌లిసి నిర్మిస్తున్నారు. ప్ర‌స్తుతం హైద‌రాబాద్ లో షూటింగ్ జ‌రుగుతోంది. ఈ సినిమా కోసం రూ.120 కోట్ల బ‌డ్జెట్ కేటాయించార‌ని ఇన్ సైడ్ వ‌ర్గాలు చెబుతున్నాయి. తేజ్ కెరీర్‌లో ఇదే భారీ బ‌డ్జెట్ సినిమా. ‘విరూపాక్ష’తో ఇటీవ‌లే ఓ మంచి హిట్ కొట్టాడు తేజ్. ఆ న‌మ్మ‌కంతోనే ఈ సినిమాపై భారీగా ఖర్చు పెట్ట‌డానికి నిర్మాత‌లు సిద్ద‌మైపోయారు. ఈ సినిమా కోసం హైద‌రాబాద్ లో ఏకంగా ఆరేడు సెట్లు తీర్చిదిద్దుతున్నారు. సెట్ల‌కే దాదాపు రూ.20 కోట్ల వ‌ర‌కూ ఖ‌ర్చువుతుంద‌ని టాక్‌. ఇందులో ఓ ప‌ల్లెటూరు సెట్ కూడా ఉంది. ఈ చిత్రం కోసం ‘సంబ‌రాల ఏటిగ‌ట్టు’ అనే పేరు ప‌రిశీలిస్తున్నారు. ఐశ్వ‌ర్య ల‌క్ష్మి క‌థానాయిక‌గా న‌టిస్తోంది. మిగిలిన వివ‌రాలు త్వ‌ర‌లో వెల్ల‌డ‌వుతాయి.
