పంజాబ్ రాష్ట్రంలో పఠాన్ కోట్ ఎయిర్ బేస్ పై శనివారం తెల్లవారుజామున సుమారు 3.30 గంటలకు నలుగురు ఉగ్రవాదులు దాడికి ప్రయత్నించారు. సైనిక దుస్తులు ధరించి అధికారిక వాహనాలలో వచ్చిన ఆ నలుగురు విచక్షణారహితంగా కాల్పులు జరుపుతూ లోపలకి ప్రవేశించేందుకు ప్రయత్నించారు. కానీ తక్షణమే అప్రమత్తమయిన భద్రతా బలగాలు వారి దాడిని తిప్పికొట్టాయి. భద్రత దళాల కాల్పులలో ఇద్దరు ఉగ్రవాదులు మరణించారు.

ఈ సంగతి తెలిసిన వెంటనే హెలికాఫ్టర్లలో అదనపు భద్రతాబలగాలను పఠాన్ కోట్ తరలించినట్లు సరిహద్దు భద్రతా దళాల డి.ఐ.జి. కున్వర్ విజయ్ ప్రతాప్ సింగ్ తెలిపారు. నిన్న నూతన సంవత్సరం రోజున సైనికదుస్తులలో వచ్చిన కొందరు దుండగులు పంజాబ్ కి చెందిన ఒక సీనియర్ పోలీస్ అధికారితో సహా మరో ఇద్దరిని కిడ్నాప్ చేసి ఎత్తుకుపోయారు. వారి ముగ్గురినీ ఆ దుండగులు బాగా కొట్టి ఆ తరువాత పఠాన్ కోట్ వద్ద విడిచిపెట్టి వెళ్ళిపోయారు. బహుశః ఈ రెండు సంఘటనలకు ఏదో సంబంధం ఉండి ఉండవచ్చని అధికారులు అనుమానిస్తున్నారు. ప్రస్తుతం మిగిలిన ఇద్దరు ఉగ్రవాదులకు భద్రతాదళాలకు మధ్య కాల్పులు కొనసాగుతున్నాయి.

భారత్-పాక్ సరిహద్దుకు చాలా సమీపంలో ఉన్న పఠాన్ కోట్ ఎయిర్ బేస్ చాలా కీలకమయిన రక్షణ స్థావరాలలో ఒకటిగా చెప్పవచ్చును. అది పంజాబ్, జమ్మూ కాశ్మీర్ మరియు హిమాచల్ ప్రదేశ్ రాష్ట్రాలకు ఒక జంక్షన్ వంటిది. ఇది పాకిస్తాన్ సరిహద్దుకి కేవలం 25 కి.మీ. దూరంలో, గురుదాస్ పూర్ పోలీస్ హెడ్ క్వార్టర్స్ కి కేవలం 10 కిమీ దూరంలో ఉంది.

తాజా సమాచారం: దాడికి పాల్పడిన నలుగురు ఉగ్రవాదులు భద్రతాదళాల చేతిలో హతమయ్యారు. ఉగ్రవాదుల దాడుల్లో వైమానిక సిబ్బందికి చెందిన ఇద్దరు మృతి చెందారు. ఉగ్రవాదులు జైషే మహ్మద్ లేదా లష్కరే తాయిబా సంస్థలకు చెందినవారయి ఉండవచ్చని అధికారులు భావిస్తున్నారు. భద్రతాదళాలు పరిసర ప్రాంతాలలో ఇంకా గాలిస్తున్నాయి.