హైదరాబాద్ సెంట్రల్ యూనివర్సిటీలో రోహిత్ అనే విద్యార్ధి ఆత్మహత్య చేసుకోవడంపై మజ్లీస్ తో సహా అన్ని రాజకీయ పార్టీలు చాలా చురుకుగా స్పందించాయి. ఆ విద్యార్ధి మృతికి సంతాపం, అతని కుటుంబానికి సానుభూతి, అతని తోటి విద్యార్ధులకు సంఘీభావం తెలుపుతున్నాయి. అయితే వారి హడావుడి వెనుక అసలు ఉద్దేశ్యాలు ఏమిటో అందరికీ తెలుసు. వారికి నిజంగా విద్యార్ధుల మీద అంత ప్రేమ అభిమానం ఉండి ఉంటే గత పదిరోజులుగా సస్పెండ్ అయిన విద్యార్ధులు యూనివర్సిటీ ముందు టెంట్ వేసుకొని నిరసన దీక్ష చేస్తునప్పుడే వచ్చి వారికి సంఘీభావం ప్రకటించి, వారిపై యూనివర్సిటీ విధించిన సస్పెన్షన్ ఎత్తివేయించేందుకు కృషి చేసి ఉండి ఉంటే రోహిత్ ప్రాణాలు కోల్పోయేవాడే కాదు. అప్పుడు చూపని ఆసక్తి ఇప్పుడే ఎందుకు చూపుతున్నారో అందరికీ తెలుసు.
అందుకే మజ్లీస్ పార్టీతో సహా అన్ని రాజకీయ పార్టీలు దీనిపై గట్టిగా మాట్లాడుతున్నాయి. కాంగ్రెస్ పార్టీ అయితే మరొక అడుగుముందుకు వేసి రాహుల్ గాంధినే బరిలోకి దింపింది. నేను ఒక రాజకీయ నాయకుడిగా ఇక్కడికి రాలేదు అని చెపుతూనే, విద్యార్ధులతో మాట్లాడుతూ కేంద్ర ప్రభుత్వ అసహన వైఖరి గురించి రాహుల్ గాంధి ప్రస్తావించేరు. కేంద్రం వైఖరే ఇక్కడ యూనివర్సిటీలో కూడా ప్రతిఫలిస్తోందని అన్నారు. ప్రజలందరికీ భావ ప్రకటన స్వేచ్చ ఉండాలని, దానిని కొన్ని యూనివర్సిటీలు కులం, మతం, ప్రాంతం పేరిట హరించివేస్తున్నాయని అన్నారు. రోహిత్ కుటుంబానికి నష్ట పరిహారం చెల్లించాలని డిమాండ్ చేసారు.
రాహుల్ గాంధీ చెపుతున్న భావప్రకటన స్వేచ్చకి రోహిత్ ఆత్మహత్యకి ఎటువంటి సంబందమూ లేదు. వేరే ఇతర కారణాల చేత రోహిత్, మరి కొందరు విద్యార్ధులు సస్పెండ్ అయ్యారు. కానీ రాహుల్ గాంధి ఈ ఘటనని తన రాజకీయ ప్రత్యర్ధి ప్రధాని నరేంద్ర మోడితో ముడిపెట్టే ప్రయత్నంలో భావ ప్రకటన స్వేచ్చ ప్రస్తావన తీసుకువచ్చినట్లు భావించవచ్చును. రాజకీయాలు చేయడానికి రాలేదని చెపుతూనే మళ్ళీ ఈవిధంగా రాజకీయాలు చేసారు. డిల్లీ వెళ్లిన తరువాత ఈ సంఘటన ఆధారంగా బహుశః మళ్ళీ ప్రధాని నరేంద్ర మోడిని, కేంద్రమంత్రులపై మళ్ళీ విమర్శలు గుప్పిస్తారేమో?
ఇటువంటి మూస రాజకీయ పద్దతులకు అలవాటు పడిన తన కాంగ్రెస్ పార్టీని సమూలంగా ప్రక్షాళన చేస్తానని రాహుల్ గాంధి ఇదివరకు చెప్పేవారు. ఒక నూతన దృక్పధం, నూతన ఆలోచనా విధానాలు, యువశక్తితో కూడిన ఒక నూతన కాంగ్రెస్ పార్టీని అవిష్కరించాలనేది తన కోరిక అని చెప్పేవారు. కానీ చివరికి తనే ఆ కాంగ్రెస్ పార్టీ చట్రంలో ఒద్దికగా ఇమిడిపోయి అదే మూస పద్దతులలో రాజకీయాలు చేస్తున్నారు.
