నంద‌మూరి అభిమానులు ఎప్ప‌టి నుంచో ఎదురు చూస్తున్న ఘ‌ట్టానికి ముహూర్తం ఫిక్స‌య్యింది. బాల‌య్య న‌ట వార‌సుడు నంద‌మూరి నాలుగోత‌రం హీరో.. మోక్ష‌జ్ఞ ఎంట్రీకి రంగం సిద్ధ‌మైంది. ఆయ‌న కోసం ప్ర‌శాంత్ వ‌ర్మ వేడి వేడిగా ఓ కథ‌ని వండుతున్నాడు. అయితే మోక్షుని బాల‌కృష్ణ ఫ్యాన్స్ ముందుకు ఎప్పుడు తీసుకొస్తార‌న్న‌దే అస‌లు ప్ర‌శ్న‌. సెప్టెంబ‌రు 1న హైద‌రాబాద్ లో బాల‌కృష్ణ కోసం ఓ భారీ వేడుక చేయ‌బోతోంది తెలుగు చిత్ర‌సీమ‌. బాల‌కృష్ణ న‌టుడిగా త‌న ప్ర‌స్థానాన్ని మొద‌లెట్టి 50 ఏళ్లు పూర్త‌యిన సంద‌ర్భంగా ఆయ‌న్ని స‌త్క‌రించుకొంటున్నారు. ఇదే రోజున మోక్ష‌జ్ఞ‌ని బాల‌య్య అభిమానుల‌కు ప‌రిచ‌యం చేస్తార‌ని తెలుస్తోంది. ఇదే వేదిక‌పై… మోక్ష‌జ్ఞ తొలి సినిమా విశేషాల్ని కూడా రివీల్ చేసే అవ‌కాశాలు పుష్క‌లంగా ఉన్నాయి.

సెప్టెంబ‌రు 6న మోక్ష‌జ్ఞ పుట్టిన రోజు. ఈ సంద‌ర్భంగా త‌న డెబ్యూ సినిమాకి క్లాప్ కొట్టేస్తార‌ని ఇన్ సైడ్ వ‌ర్గాలు చెబుతున్నాయి. ఇందులో బాల‌య్య కూడా ఓ స్పెష‌ల్ రోల్ లో క‌నిపిస్తార‌ని చెబుతున్నారు. అంటే… బాల‌కృష్ణ – మోక్ష‌జ్ఞ‌ల‌ను ఒకేసారి స్క్రీన్ పై చూసే అవ‌కాశాలు ఉన్నాయ‌న్న‌మాట‌. ప్ర‌శాంత్ వ‌ర్మ క‌థ‌ల‌న్నీ రొటీన్‌కి భిన్నంగా ఉంటాయి. సైన్స్ ఫిక్ష‌న్లు, సోషియో ఫాంట‌సీ క‌థ‌లు ప్ర‌శాంత్ వ‌ర్మ ద‌గ్గ‌ర రెడీగా ఉన్నాయి. త‌న ప్ర‌తీ క‌థ‌లోనూ ఓ సూప‌ర్ మేన్ ని చూపించాల‌న్న‌ది తాప‌త్ర‌యం. మోక్ష‌జ్ఞ కోసం కూడా అలాంటి సెట‌ప్ లోనే క‌థ‌ని సిద్ధం చేశాడ‌ని ఇన్ సైడ్ వ‌ర్గాలు చెబుతున్నాయి.