హస్తం గుర్తున్న కాంగ్రెస్ పార్టీకి ఆ పార్టీ సీనియర్ నేత దానం నాగేందర్ హ్యాండ్ ఇవ్వబోతున్నట్లు వస్తున్న వార్తలను ఆయనే స్వయంగా ఖండించినప్పటికీ ఆయన సోమవారం సాయంత్రం తెరాసలో చేరబోతున్నారనే వార్తలు జోరుగా ప్రచారం సాగుతోంది. తెలంగాణా ముఖ్యమంత్రి కేసీఆర్ స్వయంగా తనకు గులాబీ కండువా కప్పి పార్టీలోకి ఆహ్వానిస్తేనే చేరాలని దానం నాగేందర్ భావించారని, కానీ కేసీఆర్ ఆయుత చండీయాగం ఏర్పాట్ల హడావుడిలో ఉన్నందున ఆయన స్వయంగా దానంను ఆహ్వానించలేకపోవచ్చునని తెలియడంతో, దానం తెరాసలో చేరే విషయంలో వెనక్కి తగ్గారని వార్తలు వచ్చేయి. కానీ ఈ సంగతి తెలుసుకొని ముఖ్యమంత్రి కేసీఆర్ ఈరోజు సాయంత్రం ఆయనను పార్టీలోకి ఆహ్వానించడానికి హైదరాబాద్ వస్తున్నారని, కనుక దానం నాగేందర్ తెరాసలో చేరడం ఖాయమని తాజా సమాచారం. కనుక దానం నాగేందర్ తెరాసలో చేరబోతున్నారా లేదా అనే విషయం ఇవ్వాళ్ళ సాయంత్రానికి తెలిపోవచ్చును.