ఈ నెల 24న విడుదలవ్వాల్సిన అబ్బాయితో అమ్మాయి సినిమా వాయిదా పడ్డట్టు సమాచారం. నాగ శౌర్య, పాలక్ లల్వాని జంటగా నటించిన ఈ సినిమా రమేష్ వర్మ దర్శకత్వం వహించారు. స్నేహితులు ఎలా ప్రేమికులుగా మారుతారనే కథనే కొత్త పంథాలో చెప్పే ప్రయత్నంతో ఈ సినిమా తెరకెక్కిందని చిత్ర యూనిట్ ముందునుండి చెబుతున్నారు. ఈ చిత్ర కథ ఇప్పటి యూత్ కి అద్దం పట్టేలా ఉంటుందని చిత్ర యూనిట్ నమ్మకం.
అయితే 25న సౌఖ్యం, భలే మంచి రోజు, మామ మంచు అల్లుడు కంచు, జత కలిసే ఇలా నాలుగు సినిమాలు విడుదలవుతున్న సందర్భంలో తమ సినిమాను వాయిదా వేస్తున్నట్టు ప్రకటన చేశారు చిత్ర దర్శక నిర్మాతలు. ఇన్ని సినిమాలు ఒకేసారి విడుదలవుతున్న కారణంలో థియేటర్స్ సమస్య ఏర్పడుతుందని గమనించిన అబ్బాయితో అబ్బాయి దర్శక నిర్మాతలు సినిమాను జనవరి 1కి వాయిదా వేసుకున్నారు.
చిన్న సినిమాగా వస్తున్న అబ్బాయితో అమ్మాయి సినిమాకు మ్యాస్ట్రో ఇలయరాజా సంగీతాన్ని అందించడం విశేషం. అయితే జనవరి 1న ఇప్పటికే రామ్ ‘నేను శైలజా’.. నవీన్ చంద్ర, లావణ్య త్రిపాఠిల ‘లచ్చిందేవికి ఓ లెక్కుంది’ సినిమాలు విడుదల చేస్తున్న సంగతి తెలిసిందే. మరి ఈ పోటీ నుండి తప్పించుకున్న నాగశౌర్య ఆ రెండు సినిమాలతో ఎలా పోటీ పడతాడో చూద్దాం.
