మోడీ ప్రధానిగా బాధ్యత చేపట్టిన కొత్తలో అనేక అనవసరమయిన స్టాండింగ్ కమిటీలను తొలగించి, నిర్ణయాలు తీసుకొనే అధికారం ఆయా శాఖల మంత్రులకే అప్పగించారు. దానిపై ప్రతిపక్షాలు విమర్శలు చేసినా ఆయన చలించలేదు. అది చాలా మంచి నిర్ణయమేనని ప్రజలు భావించారు. దాని వలన అనవసరమయిన వృధా ఖర్చులు తగ్గించడమే కాకుండా, మంత్రులే స్వయంగా నిర్ణయాలు తీసుకోవడం వలన పాలనలో వేగం, పారదర్శకత పెరుగుతుందని అందరూ భావించారు. కానీ ఏడాదిన్నర తిరిగేసరికి మోడీ ప్రభుత్వం కూడా మళ్ళీ ప్రతీ పనికి ఒక కమిటీని ఏర్పాటు చేయడానికి అలవాటుపడిపోయింది.
తాజాగా కేంద్రం ఒక అంతర్ రాష్ట్ర మండలిని ఏర్పాటు చేసింది. అది అంతర్ రాష్ట్ర వివాదాలు, విబేదాలు, సమస్యలు, అభివృద్ధి కార్యక్రమాలను పర్యవేక్షిస్తుంది. దానికి ప్రధాని నరేంద్ర మోడియే చైర్మన్ గా వ్యవహరిస్తారు. విశేషమేమిటంటే దానిలో ఆంధ్రప్రదేశ్ ముఖ్యమంత్రి చంద్రబాబు నాయుడుని సభ్యుడిగా నియమిస్తూ కేంద్రం ఉత్తర్వులు జారీ చేసింది. ఈ అంతర్ రాష్ట్ర మండలిలో కేంద్రమంత్రులు వెంకయ్యనాయుడు, రాజ్ నాథ్ సింగ్, అరుణ్ జైట్లీ, నితిన్ గడ్కరీలతో బాటు ఆంధ్రప్రదేశ్, ఒడిషా, రాజస్థాన్, చత్తీస్ ఘడ్, ఉత్తర ప్రదేశ్, త్రిపుర రాష్ట్రాల ముఖ్యమంత్రులు సభ్యులుగా ఉంటారు.
ఆంధ్రప్రదేశ్, తెలంగాణా రాష్ట్రాల మధ్య అనేక వివాదాలు ఉన్నపుడు ఈ మండలిలో తెలంగాణా ముఖ్యమంత్రి కేసీఆర్ ని కూడా సభ్యుడిగా ఎందుకు చేర్చలేదో తెలియదు. అలాగే దక్షిణాదిన తమిళనాడుకి అటు కర్నాటకతో మరో వైపు కేరళతో కూడా నదీ జలాల వివాదాలున్నాయి. కానీ ఆ మూడు రాష్ట్రాల ముఖ్యమంత్రులలో ఎవరికీ ఇందులో స్థానం కల్పించలేదు. ఉత్తరప్రదేశ్, రాజస్థాన్ రాష్ట్రాలకు ఇరుగుపొరుగు రాష్ట్రాలతో పెద్దగా సమస్యలు లేనప్పటికీ వాటికి ఈ మండలిలో చోటు కల్పించడం కూడా ఆశ్చర్యం కలిగిస్తోంది. ఇంతకీ ఈ మండలి ఏ సమస్యలను చక్కబెడుతుందో చూడాలి.
