కృష్ణవంశీ దర్శకత్వంలో దిల్ రాజు ఓ సినిమాను నిర్మిస్తున్న సంగతి తెలిసిందే.. ఆ సినిమా టైటిల్ గురించి ఇప్పుడు చిత్ర దర్శక నిర్మాతలు ఆలోచనలో పడ్డారని తెలుస్తుంది. కృష్ణవంశీ ప్రస్తుతం వస్తున్న సినిమాల ధోరణిలోనే ఓ అద్భుతమైన హారర్ కథని సిద్ధం చేసుకున్నాడు. దిల్ రాజుకి చెప్పి సినిమా ఓకే చేయించుకున్న కృష్ణవంశీ ఆ సినిమాకు రుద్రాక్ష అనే టైటిల్ పెట్టాడు. అయితే ఆ టైటిల్ ఇదవరకే ఫిల్మ్ చాంబర్ లో నమోదు చేసి ఉందట.
యువ హీరో ఆదితో రఫ్ సినిమా తీసిన దర్శకుడు సుబ్బా రెడ్డి ఇంతకుముందే రుద్రాక్ష అనే టైటిల్ తో ఓ సినిమాను నమోదు చేసుకున్నాడట. అయితే కృష్ణవంశీ సినిమా పేరు కూడా అదే కావడంతో ఆ సినిమా నిర్మాత దిల్ రాజుని హెచ్చరించాడట. కథ ప్రకారం సినిమాకు ఆ టైటిల్ అయితేనే న్యాయం చేస్తుందని నమ్ముతున్నాడు కృష్ణవంశీ కాని దర్శకుడు సుబ్బా రెడ్డి ఇదవరకే దాన్ని నమోదు చేయడంతో వ్యవహారం అడ్డం తిరిగింది.
బడా నిర్మాత అయిన దిల్ రాజు సుబ్బా రెడ్డి దగ్గర నుండి ఆ టైటిల్ తీసుకునే ఆలోచనలో ఉన్నాడట కాని ఆ దర్శకుడు మాత్రం అసలు వెనక్కి తగ్గట్లేదని సమాచారం. అనుష్క ప్రధాన పాత్రలో వస్తున్న ఈ సినిమా వచ్చే ఏడాది మధ్యలో మొదలయ్యే అవకాశాలు ఉన్నాయ్. ప్రస్తుతం ప్రి ప్రొడక్షన్ వర్క్ జరుపుకుంటున్న ఈ సినిమా టైటిల్ గురించే ఓ స్పష్టత ఏర్పడలేదు.
