హైదరాబాద్: వెన్నుపోటు రాజకీయాలు తనపై ప్రదర్శిస్తే ఏపీ ముఖ్యమంత్రి చంద్రబాబు నాయుడు అంతు చూస్తానని వైఎస్ఆర్ కాంగ్రెస్ ఎమ్మెల్యే రోజా హెచ్చరించారు. ఆమె ఇవాళ వైఎస్ఆర్ కాంగ్రెస్ పార్టీ ప్రధాన కార్యాలయంలో మీడియాతో మాట్లాడారు. ఇవాళ అసెంబ్లీలో తెలుగుదేశం ఎమ్మెల్యే అనిత, మిగతా టీడీపీ ఎమ్మెల్యేలు తన వ్యాఖ్యలపై స్పందిచటంమీద రోజా మండిపడ్డారు. చంద్రబాబునాయుడు వెన్నుపోటు రాజకీయాలు తనపై ప్రదర్శిస్తే అంతుచూస్తానని అన్నారు. సెక్స్ రాకెట్‌ను తప్పుదారి పట్టించటానికి తనపై బురద జల్లుతున్నారని ఆరోపించారు. ఆంధ్రప్రదేశ్ అసెంబ్లీ ఎన్‌టీఆర్ ట్రస్ట్ భవన్‌లా తయారైందని అన్నారు. దేశంలోనే అత్యంత ఘోరమైన ప్రభుత్వం తెలుగుదేశం ప్రభుత్వమని చెప్పారు. టీడీపీ ఎమ్మెల్యే రేవంత్ రెడ్డి గతంలో ఎన్నోసార్లు సస్పెండ్ అయినప్పటికీ అసెంబ్లీ ఆవరణలోనే తిరిగేవారని, నిన్న మొన్న సస్పెండయిన వైసీపీ ఎమ్మెల్యేలు ప్రసాదరెడ్డి, రాజా కూడా అసెంబ్లీ ఆవరణలో తిరిగినా పట్టించుకోలేదని, తనపై కక్షసాధింపుకు పాల్పడ్డారని అన్నారు. చంద్రబాబునాయుడు భార్య, కోడలుకు కూడా ఒక విజ్ఞప్తి చేశారు. విజయవాడవంటి ఎన్నోచోట్ల తెలుగుదేశం ప్రభుత్వం వలన ఆడవాళ్ళు రోదిస్తున్నారని, వారి కన్నీళ్ళ ఉసురు కొడుతుందని హెచ్చరించారు. మంత్రి యనమల తనంత తెలివిగలవాడు ప్రపంచంలోనే ఎవరూ లేరన్నట్లు మాట్లాడుతున్నారని రోజా అన్నారు.