నందమూరి నట సింహం యువరత్న బాలకృష్ణ ప్రస్తుతం 99వ సినిమా ‘డిక్టేటర్’ చేస్తున్న సంగతి తెలిసిందే. ఇటీవల ఆడియో వేడుక జరుపుకున్న ఈ చిత్రం సంక్రాంతి పండుగ సందర్భంగా ప్రేక్షకులముందుకు రానుంది. బాలయ్య నటించిన 99వ సినిమా ఇది. ఇక తన 100వ సినిమా కోసం బోయపాటికి ఎప్పుడో పచ్చజెండా ఊపాడు నట సింహం. బోయపాటి కూడా అటు అల్లు అర్జున్ తో చేస్తున్న సరైనోడు సినిమా చేస్తూనే బాలయ్య బాబు 100వ సినిమా కథ సిద్ధం చేయడం జరిగిందట. ఇదంతా బాగానే ఉన్నా బాలకృష్ణ టేబుల్ మీదకు ఇటీవల తమిళంలో విడుదలయ్యి సంచలన విజయం అందుకున్న అజిత్ వేదళం సినిమా వచ్చిందట.
ముందు మెగాస్టార్ చిరంజీవి ఆ తర్వాత యంగ్ టైగర్ ఎన్టీఆర్ వేదళం తెలుగు రీమేక్ చేస్తారంటూ హడావిడి చేశారు. అయితే వారిద్దరు ముందుకు రాకపోవడంతో ఇప్పుడు ఆ సినిమా బాలయ్య చెంత చేరిందట. అయితే బోయపాటి దర్శకత్వంలో 100వ సినిమాగా ఆ సినిమా రీమేక్ చేస్తాడా లేక సింహా, లెజెండ్ లానే మరో ఎమోషనల్ కథ తీసుకుంటాడా అన్నది తెలియాల్సి ఉంది.
ప్రస్తుతం బాలయ్య 100వ సినిమా కథ ఎలా తీస్తే బాగుంటుందా అనే ఆలోచనలో ఉన్నాడు. అయితే వేదళం ఒక సెంటిమెంట్ సినిమా కాబట్టి కుదిరితే 101 సినిమాగా దాన్ని చేసే ఛాన్స్ ఉందేమో కాని 100వ సినిమాగా మాత్రం మరోసారి బోయపాటి దర్శకత్వంలో అద్భుత సృష్టిగా రావాల్సిందే. భారీ అంచనాలున్న బాలయ్య బాబు ౧౦౦ సినిమా చరిత్రలో నిలిచిపోయే ఘన విజయం సాధించాలని ప్రతి ఒక్క నందమూరి అభిమాని కోరుకుంటున్నాడు.
