హైదరాబాద్: తెలుగు సినీ పరిశ్రమలో టాప్ హీరోలందరూ జాగ్వర్ గానీ, రేంజ్ రోవర్‌గానీ వాడుతున్నారు. ప్రపంచంలోనే అత్యంత ఖరీదైన కార్లలో ఒకటైన రోల్స్ రాయిస్ కారు ఇప్పటివరకు చిరంజీవికి మాత్రమే ఉంది. దానిని కూడా చిరంజీవి కొనలేదు. రాంచరణ్ దానిని తండ్రికి గిఫ్ట్‌గా ఇచ్చారు. ఇప్పుడు యంగ్ రెబల్ స్టార్ ప్రభాస్ దానిని కొన్నారన్న వార్త ఫిల్మ్ నగర్‌లో రౌండ్‌లు కొడుతోంది. రోల్స్ రాయిస్‌లో ఫాంటమ్ మోడల్‌దైన ఆ కారు ఖరీదు అక్షరాలా రు.8 కోట్లట. అత్యాధునిక సాంకేతిక పరిజ్ఞానం, సౌకర్యాలు దీనిలో ఉన్నాయని సమాచారం. ఇటీవలే ప్రభాస్‌కు అది డెలివరీ అయిందట. ఈ సందర్భంగా ప్రభాస్ తన ఫామ్ హౌస్‌లో ఫ్రెండ్స్‌కు భారీ పార్టీ ఇచ్చాడని చెబుతున్నారు. ప్రభాస్ ఇటీవల మహేంద్ర కంపెనీ వారి కంపాక్ట్ ఎస్‌యూవీ ‘టీయూవీ 300’కు మోడల్‌గా వ్యవహరించిన సంగతి తెలిసిందే. ప్రభాస్ ప్రస్తుతం బాహుబలి 2 చేస్తున్నారు.