సూపర్ స్టార్ మహేష్, తమిళ దర్శకుడు మురుగదాస్ కలిసి ఓ సినిమా చేయబోతున్నారన్న సంగతి తెలిసిందే. అయితే ఇంకా మొదలే కాని ఈ సినిమా గురించి మీడియా నానా హడావిడి చేస్తుంది. సినిమా పేరు కూడా ‘చట్టానికి కళ్లు లేవు’, ‘చట్టంతో పోరాటం’ అంటూ ఏవేవో ఊహాగానాలు చేశారు. అయితే దీని గురించి అటు మహేష్ కాని మురుగదాస్ కాని నోరు మెదపలేదు.

అయితే ఇటీవల ఓ ప్రెస్ మీట్ లో పాల్గొన్న మురుగదాస్, మహేష్ సినిమా గురించి వస్తున్న వార్తలన్ని రూమర్లంటూ కొట్టిపారేశాడు. సినిమా చేస్తుంది నిజమే అయినా సినిమా టైటిల్ విషయంలో ఇంకా నిర్ణయం తీసుకోలేదని అన్నాడు. అంతేకాదు సినిమాలో మహేష్ ద్విపాత్రాభినయం చేస్తున్నాడన్న వాదనలను కూడా కొట్టిపారేశాడు. ప్రస్తుతం బాలీవుడ్ లో సోనాక్షి సిన్హా లీడ్ రోల్ గా అకిరా సినిమా తీస్తున్న మురుగదాస్ ఆ సినిమా తర్వాత మహేష్ సినిమా మొదలుపెట్టనున్నాడు.

ప్రస్తుతం మహేష్ కూడా బ్రహ్మోత్సవం సినిమా షూట్ లో ఉన్నాడు. వీరిద్దరి కలయికతో వస్తున్న ఈ సినిమా ఏప్రిల్ లో మొదలయ్యే అవకాశాలు కనిపిస్తున్నాయి. అత్యంత ప్రతిష్టాత్మకంగా నిర్మితమవుతున్న ఈ సినిమా బడ్జెట్ దాదాపు 100 కోట్లకు పైగా ఉంటుందని అంచనా.. తెలుగు, తమిళ, హిందీ భాషల్లో ఈ సినిమాను పారాస్ జైన్, ఠాగూర్ మధులు నిర్మిస్తున్నారు.