ప్రతి ఏటా అల్లు రామలింగయ్య పేరుతో ఇచ్చే జాతీయ పురస్కారాన్ని 2015 సంవత్సరంకు గాను దర్శకేంద్రుడు కె.రాఘవేంద్ర రావుకి ఇచ్చారు. ఇటీవల జరిగిన ఈ కార్యక్రమంలో మెగా ఫ్యామిలీ అంతా పాల్గొనడం జరిగింది. తెలుగు సినిమా చరిత్రలో తన హాస్యంతో నవ్వుల జల్లులను కురిపించిన అల్లు.. హాస్యానికి నిలువెత్తు రూపంలా ఎప్పటికీ తెలుగు వారి గుండెల్లో నిలిచిపోయారు. మరి అటువంటి మహనీయుడి జాతీయ పురస్కారాన్ని అందుకున్న రాఘవేంద్ర రావు తనకు దక్కిన ఈ గౌరవం గురించి మాట్లాడారు.

ఇక ఈ కార్యక్రమంలో మెగాస్టార్ చిరంజీవి రాఘవేంద్రరావు గొప్పతనం గురించి ప్రస్తావించారు. పెళ్లైన కొత్తలో సినిమా షూటింగ్ కోసం మద్రాసు వెళ్లాల్సి వస్తే.. తన భోగీ అంతా పూలు, పండ్ల తో డెకరేట్ చేయించి రైల్లో శోభనం వాతావరణాన్ని సృష్టించారు రాఘవేంద్ర రావు అని అన్నారు. ఇక కార్యక్రమానికి అల్లు అరవింద్, అల్లు అర్జున్, శిరీష్ లు వచ్చి కార్యక్రమాన్ని విజయవంతం చేశారు.

పలువురు సిని ప్రముఖులు కూడా ఈ కార్యక్రమానికి హాజరయ్యి రాఘవేంద్ర రావుకి తమ అభినందనలు తెలిపారు. అల్లు రామలింగయ్య మరణించిన నాటి నుండి ప్రతి ఏటా మెగా, అల్లు కుటుంబాలు ఈ పురస్కార ప్రధానోత్సవాన్ని క్రమం తప్పకుండా జరుపుతూ ఆ మహనీయుడు హాస్యమారవిందమాలను మరోసారి గుర్తు చేసుకునేలా చేస్తున్నారు.