పవన్‌కళ్యాణ్‌ కెరీర్‌లో పెద్ద కమర్షియల్‌ హిట్‌గా ‘ఖుషి’ చిత్రం నిలుస్తుంది. ఆ చిత్రానికి పవన్‌కి వచ్చిన మంచి పేరు వల్ల ఆ తర్వాత అతను ఎన్ని ఫ్లాప్‌ సినిమాలు చేసినా తప్పకుండా పెద్ద హిట్‌ ఇస్తాడని అభిమానులు ఓపికగా ఎదురుచూశారు. ‘ఖుషి’ చిత్రాన్ని డైరెక్ట్‌ చేసిన ఎస్‌.జె.సూర్యతో ‘కొమరం పులి’ చేస్తున్నాడని తెలిసి తమ అభిమాన హీరోకి మరో బిగ్గెస్ట్‌ హిట్‌ రాబోతోందని అందరూ ఎంతో ఆశగా ఎదురుచూశారు. కానీ, ఆ సినిమా పెద్ద డిజాస్టర్‌ అయి అభిమానుల్ని నిరాశ పరిచింది. ఆ తర్వాత ‘గబ్బర్‌సింగ్‌’, ‘అత్తారింటికి దారేది’ వంటి బ్లాక్‌ బస్టర్స్‌ని తన ఖాతాలో వేసుకున్న పవన్‌ ఇప్పుడు ‘సర్దార్‌ గబ్బర్‌సింగ్‌’ షూటింగ్‌లో బిజీగా వున్నాడు. ఈ సినిమా ‘గబ్బర్‌సింగ్‌’ని మించిన హిట్‌ అవుతుందని అభిమానులు హోప్స్‌ పెట్టుకున్నారు. అయితే ఈ సినిమా తర్వాత పవన్‌ చెయ్యబోయే సినిమా గురించి తెలిసి మరోసారి తప్పు చెయ్యబోతున్నాడా అనే అనుమానం అందరికీ వస్తుంది. ఎస్‌.జె.సూర్యతో పవన్‌ సినిమా చెయ్యబోతున్నాడన్న విషయం అందరికీ తెలిసిందే. వీళ్ళిద్దరి కాంబినేషన్‌లో వచ్చిన ‘కొమరం పులి’ పెద్ద డిజాస్టర్‌ కావడంతో మళ్ళీ ఈ కాంబినేషన్‌లో సినిమా చెయ్యడానికి ఏ నిర్మాతా ముందుకు రావడం లేదట. అయినా వెనక్కి తగ్గేది లేదు అన్నట్టుగా ఎస్‌.జె.సూర్యతో తను చెయ్యబోయే సినిమాని తన సొంత బేనర్‌లోనే తియ్యడానికి డిసైడ్‌ అయ్యాడు పవన్‌. ఈ విషయం తెలుసుకున్న అభిమానులు మళ్ళీ తమ హీరో తప్పు చేస్తున్నాడని ఆవేదన చెందుతున్నారట. మరి ఈ విషయం గురించి పవన్‌ పునరాలోచించుకుంటాడా? లేక సూర్యతో సినిమా చెయ్యడానికే ఫిక్స్‌ అవుతాడా? అనేది తెలియాల్సి వుంది.