మంచు ఫ్యామిలీకి ఓ ప్ర‌త్యేక‌త ఉంది. త‌మ‌లో ఎవ‌రి సినిమా అయినా, మిగిలిన వాళ్లు అతిథి పాత్ర‌లో మెరుస్తారు. లేదంటే ఓ పాట పాడ‌తారు. అదీ లేదంటే ఓ ఫైట్ కంపోజ్ చేసి పెడ‌తారు. లేదంటే ప్రొడ‌క్ష‌న్ వ్య‌వ‌హారాల‌న్నీ చూసుకుంటారు. ఈసారీ అదే జ‌రుగుతోంది. మోహ‌న్ బాబు క‌థానాయ‌కుడిగా న‌టిస్తున్న చిత్రం ‘గాయ‌త్రి’. ఈ సినిమాలోకి విష్ణు ఎంట్రీ ఇచ్చేశాడు. ఓ కీల‌కమైన పాత్ర‌లో విష్ణు క‌నిపించ‌బోతున్నాడు. ఈ పాత్ర‌కీ ఓ విశేషం ఉంది. అదేంటంటే, ఈ సినిమాలో మోహ‌న్ బాబు పాత్ర రెండు కోణాల్లో ఉంటుంది. పాతికేళ్ల క్రితం మోహ‌న్ బాబు గా విష్ణు న‌టించ‌నున్నాడు. పెరిగి పెద్ద‌వాడైన త‌ర‌వాత‌.. మోహ‌న్ బాబుగా మార‌తాడ‌న్న‌మాట‌. ఇదేదో… కొత్త ఎటెమ్ట్‌లానే క‌నిపిస్తుంది. ఈ సినిమాలో మ‌రో కీల‌క‌మైన పాత్ర కోసం శ్రియ‌ని ఎంచుకొన్నారు. ఇందులో విష్ణు, శ్రియ భార్యా భ‌ర్త‌లుగా క‌నిపిస్తార‌ని స‌మాచారం. ప్ర‌స్తుతం హైద‌రాబాద్‌లోని రామోజీ ఫిల్మ్‌సిటీలో చిత్రీక‌ర‌ణ జ‌రుగుతోంది. మ‌ద‌న్ ద‌ర్శక‌త్వం వ‌హిస్తున్న ఈ చిత్రానికి త‌మ‌న్ సంగీతం అందిస్తున్నాడు. ల‌క్ష్మీ ప్ర‌స‌న్న పిక్చ‌ర్స్ ప‌తాకంపై మోహ‌న్ బాబు ఈ చిత్రాన్ని నిర్మిస్తున్నారు.