తెలుగు భాష‌పై ప‌ట్టు, మ‌మ‌కారం ఉన్న ద‌ర్శ‌కుల్లో ఇంద్ర‌గంటి మోహ‌న కృష్ణ కూడా ఉంటాడు. అష్టాచ‌మ్మా, గోల్కొండ హైస్కూల్‌, అమీతుమీ.. ఇలా అత‌ని పేర్లు అందంగా, అర్థ‌వంతంగా ఉంటాయి. ఇప్పుడు ఇలాంటి టైటిలే మ‌రోటి ఎంచుకున్నాడు. అదే స‌మ్మోహ‌నం. ప్ర‌స్తుతం సుధీర్ బాబుతో ఓ సినిమా తెర‌కెక్కిస్తున్నాడు ఇంద్ర‌గంటి. ఇది కూడా రొమాంటిక్ కామెడీ జోన‌ర్‌లో సాగే సినిమా అట‌. అందుకు త‌గ్గ‌ట్టుగానే.. ‘స‌మ్మోహ‌నం’ అనే టైటిల్ ఫిక్స్ చేసిన‌ట్టు స‌మాచారం. శ్రీ‌దేవి మూవీస్‌పై శివ‌లంక కృష్ణ ప్ర‌సాద్ ఈ చిత్రాన్ని నిర్మిస్తున్నారు. షూటింగ్ కూడా దాదాపుగా పూర్తి కావొచ్చింద‌ట‌. త‌న సినిమాని ఆఘమేఘాల మీద పూర్తి చేయ‌డం ఇంద్ర‌గంటి అల‌వాటు. ఈసారీ.. చ‌క‌చ‌క ఈ చిత్రాన్ని పూర్తి చేసేశాడు. ప్ర‌స్తుతం పోస్ట్ ప్రొడక్ష‌న్ కార్య‌క్ర‌మాలు జ‌రుగుతున్నాయి. త్వ‌ర‌లోనే టైటిల్‌ని అధికారికంగా ప్ర‌క‌టిస్తారు.