తెలంగాణా ప్రభుత్వం 2016 లో దసరా పండుగ రోజున 31 జిల్లాలతో కొత్త తెలంగాణా మ్యాప్ ని ఆవిష్కరించిన విషయం తెలిసిందే. అయితే ఇప్పుడు రాష్ట్రంలో కొత్త జిల్లాలపై ప్రభుత్వం పునరాలోచనలో పడినట్టు తెలుస్తోంది. త్వరలో కొన్ని జిల్లాలను ప్రక్క జిల్లాల్లో విలీనం చేయనున్నట్టు, తద్వారా జిల్లాల సంఖ్య ని తగ్గించనున్నట్టు తెలుస్తోంది. వివరాల్లోకి వెళ్తే..

రాష్ట్రంలో అదనంగా ఏర్పాటు చేసిన పలు కొత్త జిల్లాలను కొనసాగించాల్సిన అవసరం ఉందా అని ముఖ్యమంత్రి ఆరా తీస్తున్నట్లు తెలిసింది. స్థానిక అవసరాలు, ప్రజల డిమాండ్లు, నేతల ఒత్తిళ్ల కారణంగా 31 జిల్లాలు ఏర్పాటు చేసినా, పెద్దగా ప్రయోజనం ఉండటం లేదని తెలంగాణా ప్రభుత్వం నిర్ధారణకు వచ్చినట్టు తెలుస్తోంది. చివరి దశలో నేతల ఒత్తిళ్లతో తెరపైకి వచ్చిన కొత్త జిల్లాలు చిక్కులు తెచ్చిపెట్టాయని ప్రభుత్వం భావిస్తున్నట్టు తెలుస్తోంది . ఈ క్రమంలో ఇప్పటికీ జిల్లాలు, మండలాల పునర్వ్యవస్థీకరణకు సంబంధించి జరుగుతున్న ఆందోళనలు, అక్కడి ప్రజల అభిప్రాయాలను తెలుసుకోవాలని అధికారులను, పార్టీ ముఖ్య నేతలను ముఖ్యమంత్రి పురమాయించినట్లు తెలిసింది. పైగా ఒక్కసారిగా జిల్లాల సంఖ్య బాగా పెరగటంతో ఉద్యోగుల సర్దుబాటు, అధికారుల నియామకం తలనొప్పిగా మారింది.

కాబట్టి అలా అదనంగా ఏర్పాటు చేసిన జిల్లాలను చుట్టుపక్కల ఉన్న జిల్లాల్లో విలీనం చేయాలని యోచిస్తోంది. వరంగల్‌ రూరల్‌ ( అర్బన్ లో విలీనం ?) , జనగాం, నిర్మల్, పెద్దపల్లి, మేడ్చల్‌ జిల్లాలు రద్దయ్యే జాబితాలో ఉన్నట్టు తెలుస్తోంది. ఇప్పటికే ఆ దిశగా అధికారులతో ముఖ్యమంత్రి చర్చించినట్లు సమాచారం. అయితే సమర్థవంతమైన పాలన అందించేందుకు అవసరమైన కొత్త జిల్లాలను మాత్రం యథాతథంగా కొనసాగించాలని భావిస్తోంది. త్వరలో ఈ విషయం పై పూర్తి క్లారిటీ ప్రభుత్వం నుంచి రావచ్చని తెలుస్తోంది.