ఎన్టీఆర్ హీరోగా త్రివిక్రమ్ డైరెక్షన్‌లో హారిక హాసిని సంస్థ నిర్మించే సినిమా మ్యూజిక్ సిట్టింగ్స్ జరుగుతున్నాయి. ఇప్పటివరకు ఎన్టీఆర్‌తో ఓ పాట పాడించాలని త్రివిక్రమ్‌కి ఆలోచన లేదు. ఒకవేళ మనసులో ఉందేమో… బయటకు చెప్పలేదు. కానీ, సంగీత దర్శకుడు ఎస్.ఎస్. తమన్ మాత్రం యంగ్ టైగర్ ఎన్టీఆర్‌తో ఒక పాట పాడించడానికి తప్పకుండ ట్రై చేస్తానంటున్నాడు. ఆయనకు అభిమానుల నుంచి రిక్వెస్టులు బాగా వస్తున్నాయి… ఎన్టీఆర్‌తో పాడించమని! అందుకు, తమన్ సరే అంటున్నాడు.

ఎన్టీఆర్‌లో మంచి యాక్టరు ఉన్నాడు. యాక్టరుతో పాటు ఆయనలో మంచి సింగరూ ఉన్నాడు. ఆ సింగర్ అప్పుడప్పుడూ గొంతు సవరించుకుంటాడు. ఇప్పటివరకు ఆరు పాటలు పాడాడు. అందులో రెండు పాటలకు తమన్ సంగీతం అందించాడు. మిగతా సంగీత దర్శకుడు ఎన్టీఆర్ చేత ఎన్టీఆర్ హీరోగా నటించిన సినిమాల్లో పాటలు మాత్రమే పాడించారు. ఎన్టీఆర్ చేత కన్నడ పాట కూడా పాడించాడు తమన్. గట్టిగా ట్రై చేస్తే త్రివిక్రమ్ సినిమాలో పాడించడం తమన్ కి పెద్ద కష్టం ఏమీ కాదు. ఇక, ఈ సినిమాలో పాటలు సూపర్బ్ అంటున్నాడీ సంగీత దర్శకుడు. త్రివిక్రమ్, తారక్, తమన్… ట్రిపుల్ టి కలిసి వర్క్ చేస్తున్న సినిమాకి ఇంకో టి యాడ్ చేయమంటున్నాడు. అదే ‘ట్రస్ట్ మీ’ (నన్ను నమ్మండి) అంటున్నాడు.