ఎన్టీఆర్‌, సావిత్రి, ఉయ్యాల వాడ న‌ర‌సింహారెడ్డి… ఇలా టాలీవుడ్‌లో బ‌యోపిక్‌ల ప‌ర్వం న‌డుస్తోంది. ఈ మూడు సినిమాల్లో ఉన్న కామ‌న్ పాయింట్‌… బుర్రా సాయిమాధ‌వ్‌. ఈ బ‌యోపిక్‌ల‌కు ఆయనే మాట‌లు అందిస్తున్నారు. ఇప్పుడు ఆయ‌న చేతిలో మ‌రో బయోపిక్ చేరింది. ‘టైగ‌ర్ నాగేశ్వ‌ర‌రావు’ ఆత్మ‌క‌థ ఆధారంగా ఓ సినిమా చూపుదిద్దుకోనుంది. `దొంగాట`తో ఆక‌ట్టుకున్న వంశీ కృష్ణ ద‌ర్శ‌కుడు. ఈ చిత్రానికి బుర్రా మాట‌లు అందిస్తున్నారు.
టైగ‌ర్ నాగేశ్వ‌ర‌రావు… ఓ పేరు మోసిన దొంగ. కేరాఫ్‌.. స్టువ‌స్ట్‌పురం. బ‌డా బ‌డా రాజ‌కీయ నాయ‌కులు, వ్యాపార వేత్త‌ల ఇళ్ల‌లో దొంగ‌త‌నాలు చేసి వ‌ణుకు పుట్టించాడు. అప్ప‌టి ప్ర‌ధాని ఇందిరాగాంధీ ఇంట్లోనూ టైగ‌ర్ నాగేశ్వ‌ర‌రావు చోరీకి దిగాడ‌ని చెప్పుకుంటారు. జెళ్ల‌లోంచి తెలివిగా పారిపోవ‌డంలో దిట్ట.. ఈయ‌న. ఆ క‌థే ఇప్పుడు తెర‌పైకి వ‌స్తోంద‌న్న‌మాట. ఈ పాత్ర‌లో ఓ ప్ర‌ముఖ క‌థానాయ‌కుడు క‌నిపిస్తాడ‌ని స‌మాచారం. అత‌నెవ‌ర‌న్న‌ది వేచి చూడాలి.
