హైదరాబాద్: శ్రీమంతుడు చిత్రంతో గత ఏడాది బంపర్ హిట్ కొట్టిన మహేష్ బాబు ఇప్పుడు శ్రీకాంత్ అడ్డాల దర్శకత్వంలో బ్రహ్మోత్సవం చిత్రం చేస్తున్న సంగతి తెలిసిందే. ఈ చిత్రం ఇప్పుడు రామోజీ ఫిల్మ్ సిటీలో చిత్రీకరణ జరుపుకుంటోంది. మహేష్ బాబు సరసన సమంత, కాజోల్, ప్రణీత నటిస్తున్నారు. ఈ నెల 25 వరకు ఫిల్మ్ సిటీలో ఈ చిత్రం షూటింగ్ జరుపుకుంటుంది. పొట్లూరి వరప్రసాద్, మహేష్ బాబు కలిసి నిర్మించే ఈ కుటుంబకథా చిత్రం వేసవికి విడుదల కాబోతోంది. మరోవైపు బ్రహ్మోత్సవం తర్వాత మహేష్ మురుగదాస్‌తో చేయబోతున్నారన్నది తెలిసిందే. మురుగదాస్ చిత్రం తర్వాత రాజమౌళితో చేయబోతున్నట్లు మహేష్ చెప్పారు. మహేష్ ఇటీవల ఒక ఇంటర్వ్యూలో మాట్లాడుతూ, బాహుబలి లాంటి ఇండస్ట్రీ హిట్ ఇచ్చిన రాజమౌళితో మురుగదాస్ చిత్రం తర్వాత చేస్తానని స్పష్టం చేశారు. నాలుగేళ్ళుగా రాజమౌళితో కలిసి పనిచేయాలని చూస్తున్నానని, ఇప్పటికి అది కుదురుతోందని మహేష్ ఆ ఇంటర్వ్యూలో అన్నారు. దీనితో మహేష్ అభిమానుల్లో ఆనందం వ్యక్తమవుతోంది. మహేష్ – రాజమౌళి కాంబినేషన్‌‌లో రూపొందే చిత్రం ఎంతటి రేంజ్‌కు వెళుతుందో ఊహించుకోవటానికే కష్టంగా ఉంది.