ప్రభాస్‌తో చేస్తున్నాడని పుకారు పుట్టించారు. కాదు… కాదు… అల్లు అర్జున్‌తో అన్నారు. మధ్యలో అఖిల్‌ అక్కినేని పేరూ వినిపించింది. ‘రంగస్థలం’ విజయం తరవాత దర్శకుడు సుకుమార్ తదుపరి సినిమా ఎవరితో అని పెద్ద చర్చే జరిగింది. ఆయన నెక్స్ట్ సినిమా గురించి బోల్డన్ని పుకార్లు షికార్లు చేశాయి. వీటన్నిటికీ చెక్ పెడుతూ మ‌హేశ్‌బాబుతో సినిమా చేస్తున్నట్టు సుకుమార్ కన్ఫర్మ్ చేశాడు. మహేశ్ హీరోగా సుకుమార్ తీసిన ‘వన్ నేనొక్కడినే’ ఆశించిన విజయం సాధించలేదు. కమర్షియల్ సక్సెస్ పక్కన పెడితే… సినిమా చూసి ప్రేక్షకులు క‌న్‌ఫ్యూజ్‌ అయ్యారనే మాట ఎక్కువ వినిపించింది. సినిమా విడుదల తరవాత పలు ఇంటర్వ్యూలలో మ‌హేశ్‌కి ఈసారి హిట్ ఇవ్వాలనే ఆకాంక్షను సుకుమార్ వ్యక్తం చేశారు. ఆ అవకాశం రానే వచ్చింది. అయితే ఈ సినిమా మొదలవడానికి ఇంకొన్ని నెలలు సమయం పడుతుంది. ప్రస్తుతం రెండు నెలలు విశ్రాంతి తీసుకోవాలని ఈ దర్శకుడు నిర్ణయించుకున్నారు. ఆ తరవాత కథ మీద వర్క్ చేస్తారు. ఈలోపు వంశీ పైడిపల్లి దర్శకత్వంలో నటించే సినిమాను మహేశ్ పూర్తి చేస్తారు.