హాట్ న్యూస్‌ల కోసం మీడియా ఎంత తాప‌త్ర‌య‌ప‌డుతుందో తెలిసిన విష‌య‌మే. ఈ పోటీ ప్ర‌పంచంలో ఛాన‌ళ్లు, వెబ్ ఛాన‌ళ్లు పుట్ట‌గొడుగుల్లా పెరిగిపోతున్న నేప‌థ్యంలో… సెన్సేష‌న‌లిజం కోసం తాప‌త్ర‌య‌ప‌డిపోతోంది. ఓ వార్త దొరికితే దాన్ని చిల‌వ‌లు ప‌ల‌వ‌లుగా మార్చి… మ‌సాలా అద్దేస్తోంది. ప్ర‌స్తుతం ఏ టీవీ ఛాన‌ల్ చూసినా ఇదే తంతు. జ‌ర్న‌లిజం విలువ‌ల‌పై కూడా గ‌ట్టిగా చర్చ న‌డుస్తోంది. వీటిపై `భ‌ర‌త్ అనే నేను` సినిమాలో కొంత చ‌ర్చ జ‌రిగిన‌ట్టు తెలుస్తోంది. ఓ కీల‌క‌మైన ఎపిసోడ్‌లో ముఖ్య‌మంత్రి హోదాలో మ‌హేష్ ఓ జ‌ర్నలిస్టుకి క్లాస్ పీకుతాడ‌ట‌. ఆ సీన్‌లో జ‌ర్న‌లిజం విలువ‌ల గురించి మ‌హేష్‌తో కొర‌టాల శివ కొన్ని డైలాగులు ప‌లికించాడ‌ని తెలుస్తోంది. ఈ స‌న్నివేశం ఈ సినిమాలో హైలెట్‌గా నిల‌వ‌బోతోంద‌ని టాక్‌. మొత్తానికి భ‌ర‌త్ అనే నేను సినిమాకి సెన్సార్ ప‌రంగా పాజిటీవ్ టాకే వ‌స్తోంది. శ్రీ‌మంతుడులా మ‌హేష్ ఖాతాలో మ‌రో సూప‌ర్ హిట్ ప‌డ‌బోతోంద‌ని టాక్‌. చూస్తుంటే కొర‌టాల శివ వ‌రుస‌గా నాలుగో హిట్ కొట్టేట్టే క‌నిపిస్తున్నాడు.