‘బాహుబలి’ తరవాత ప్రభాస్ హీరోగా నటిస్తున్న సినిమా ‘సాహో’. ‘బాహుబలి’ సెట్స్ మీద వుండగా… స్క్రిప్ట్ వర్క్ కంప్లీట్ చేశారు. చకచకా సినిమా తీసేయాలని స్టార్ట్ చేశారు. కాని కుదరడం లేదు. దుబాయ్ షెడ్యూల్ ఇబ్బంది పెట్టేసింది. అక్కడ షూటింగ్ చేయడానికి అనుమతులు రావడానికి ఎంతో టైమ్ పట్టింది. దుబాయ్ ప్రభుత్వం అనుమతి ఇవ్వడంతో షూటింగ్ చేస్తున్నారు. అయితే… ఇప్పటివరకూ చేసిన షెడ్యూల్స్‌లో షూటింగ్ ఎంతవరకూ పూర్తయిందంటే? ఎవరూ చెప్పలేని పరిస్థితి. దర్శకుడు సుజీత్ గానీ.. యూవీ క్రియేషన్స్ నిర్మాతలు ప్రమోద్, వంశీలు గానీ… సినిమా గురించి చిన్న ముక్క కూడా చెప్పడం లేదు. హైద‌రాబాద్‌లో ప్రభాస్, హీరోయిన్ శ్రద్ధా కపూర్, విలన్లు నీల్ నితిన్ ముఖేశ్, అరుణ్ విజయ్, చుంకీ పాండే తదితరులపై కీలక సన్నివేశాలు తీశారు. ఇప్పుడు దుబాయ్ ఫైట్ తీస్తున్నారు. తరవాత మళ్లీ హైదరాబాద్ షెడ్యూల్ వుంటుందట. అయితే… ఈ సినిమా సెట్స్ మీద వుండగా ‘జిల్’ ఫేమ్ రాధాకృష్ణ దర్శకత్వంలో చేయనున్న నెక్స్ట్ సినిమా షూటింగ్ స్టార్ట్ చేయాలని ప్రభాస్ డిసైడ్ అయినట్టు వార్తలు వస్తున్నాయి. అందులో హీరోయిన్ పూజా హెగ్డే ముంబయ్ మీడియాకి ఇచ్చిన లీకుల ప్రకారం… ‘సాహో’ షూటింగ్ పూర్తయ్యాక రాధాకృష్ణ సినిమా షూటింగులో ప్రభాస్ జాయిన్ అవుతాడట. జూన్ నెలాఖరుకు ‘సాహో’ షూటింగ్ కంప్లీట్ అవుతుందని పూజ చెబుతోంది. అంత త్వరగా పూర్తయితే గొప్పే. విజువల్ ఎఫెక్ట్ వర్క్స్‌కి కావలసినంత టైమ్ వుంటుంది. వచ్చే సంక్రాంతికి సంతోషంగా సినిమా విడుదలవుతుంది.