పెద్ద అంచనాలు ఏమిలేకుండా విడుదలైన రంగస్థలం సినిమా మెగా పవర్ స్టార్ రామ్ చరణ్ కెరీర్లోనే అతిపెద్ద విజయాన్ని సాధించడం తెలిసిందే. విడుదలై నెలరోజులు దాటినప్పటికీ ఇప్పటికి కలెక్షన్లు రాబడుతూ ట్రేడ్ వర్గాలను సైతం ఆశ్చర్యానికి గురిచేసింది. ఈ సినిమాలోని రంగమ్మ మంగమ్మ పాట ఎంత పెద్ద హిట్ అయిందో తెలిసిందే. అయితే ఇప్పుడు ఆ పాటకు పేరడీగా ఓరయ్యో ఓలమ్మో అంటూ విడుదలైన పాట సోషల్ మీడియాలో వైరల్ గా మారింది. ఈ వీడియోని స్వయంగా మైత్రి మూవీ మేకర్స్ తమ యూట్యూబ్ అప్లోడ్ చేయడం విశేషం.

ఇంతకీ ఈ పాట లో ఏముందంటే – “ ఓరయ్యో ఓలమ్మో ఏం పిల్లడో ఇంతకాలం యాడ దాగే ఇంత నటుడు, సుకుమారుడు వచ్చి మంచి కథ చెబుతుంటే చిట్టిబాబు పాత్రలో లీనమై పోయే” అంటూ సాగే ఈ పాట పూర్తిగా రాంచరణ్ అభినందిస్తున్నట్లు గా సాగుతుంది. ఇంతకీ ఈ సాంగ్‌ను పేరడి చేస్తూ దుమ్ము రేపింది ఎవరో కాదు, నటుడు ఉత్తేజ్ చిన్న కూతురు పాట. పాట అన్న వెరైటీ పేరున్న ఈ చిన్నారి పేరుకు తగ్గట్టే స్వయంగా పాట పాడి, అభినయించి అదరగొట్టింది. ఉత్తేజ్ పెద్ద కుమార్తె చేతన ఈ పాటను డైరెక్ట్ చేయడమే కాకుండా శ్రీనాథ్‌తో కలిసి కొరియోగ్రఫీ కూడా చేసింది. అలాగే సినీ జర్నలిస్టు ప్రభు సాహిత్యాన్ని అందించాడు.