‘బిగ్ బాస్ 2’వ సీజ‌న్ మ‌రికొద్ది రోజుల్లో ప్రారంభం కానుంది. తొలి సీజ‌న్‌ని ఎన్టీఆర్ న‌డిపిస్తే.. ఈసారి నానికి ఆ అవ‌కాశం ద‌క్కింది. త‌రుణ్‌, మాధ‌వీల‌త‌, గీతామాధురి లాంటి వాళ్ల పేర్లు ఈసారి సెల‌బ్రెటీల లిస్టులో క‌నిపించే అవ‌కాశం ఉంద‌ని తెలుస్తోంది. ఈలోగా నాని పారితోషికంపై ఓ వార్త బ‌య‌ట‌కు వ‌చ్చింది. నానికి రూ.10 కోట్ల వ‌ర‌కూ పారితోషికం ముడుతోంద‌ని, ఎన్టీఆర్ కంటే.. ఎక్కువే అందుకోబోతున్నాడ‌ని వార్త‌లొస్తున్నాయి. నిజానికి నాని పారితోషికం రూ.10 కోట్లు కాదు. రూ.4 కోట్లే అని తెలుస్తోంది. ఎన్టీఆర్‌కి తొలి సీజ‌న్‌లో దాదాపు రూ.7.5 కోట్ల వ‌ర‌కూ ముట్టిన‌ట్టు తెలుస్తోంది. ఎన్టీఆర్ చేసిన సీజ‌న్‌లో 70 రోజులే. నాని సీజ‌న్ మాత్రం 100 రోజులు న‌డ‌వ‌బోతోంది. సాధార‌ణంగా రోజువారీ పారితోషికం ఇవ్వ‌డానికే ఇలాంటి కార్య‌క్ర‌మ నిర్వాహ‌కులు ఇష్ట‌ప‌డుతుంటారు. కానీ స్టార్స్‌తో వ్య‌వ‌హారం క‌దా, అందుకే ప్యాకేజీలు మాట్లాడుకోవాల్సివ‌స్తుంటుంది. శ‌ని, ఆదివారాల ఎపిసోడ్ల‌లోనే నాని బిగ్ బాస్ హౌస్‌లోకి ఎంట్రీ ఇస్తాడు. ఆ రెండు ఎపిసోడ్ల‌నీ ఒకే రోజు షూట్ చేస్తారు. ఆ లెక్క‌న అది నానికి ఒక రోజు ప‌నే అనుకోవాలి. ఎన్టీఆర్ నాని కంటే స్పీడు. అందుకే.. త‌ను ఇంకా స్పీడుగా ఆయా ఎపిసోడ్ల‌ని పూర్తి చేసేవాడ‌ట‌. ఈసారి విజేత ప్రైజ్‌మ‌నీ కూడా పెరిగే అవ‌కాశాలున్నాయ‌ని తెలుస్తోంది. అదెంతో తెలియాలంటే ఇంకొద్ది రోజులు ఆగాలి.