టాప్ లీగ్‌లో ఉండి కూడా ప్ర‌త్యేక గీతాలు చేస్తున్న ఏకైక క‌థానాయిక త‌మ‌న్నా అనే చెప్పాలి. ఈమ‌ధ్య హీరోయిన్‌గా కంటే, ఐటెమ్ సాంగుల స్పెష‌లిస్టుగానే త‌మ‌న్నా ఎక్కువ‌గా క‌నిపించింది. ‘జై ల‌వ‌కుశ‌’ త‌ర‌వాత మ‌రో ప్ర‌త్యేక గీతానికి త‌మ‌న్నా సై అంది. ఈసారి నాగ‌చైత‌న్య‌తో క‌ల‌సి ఆడిపాడ‌బోతోంది. `స‌వ్య‌సాచి` కోసం `నిన్ను రోడ్డు మీద చూసీన‌దీ ల‌గ్గా ఎత్తు` అనే పాట‌ని రీమిక్స్ చేస్తున్న సంగ‌తి తెలిసిందే. ఈ పాట కోసం త‌మ‌న్నాని తీసుకున్నారు. ర‌కుల్‌ప్రీత్ సింగ్ పేరు ప‌రిశీలించినా.. త‌మ‌న్నా క్రేజ్‌, పాట‌ల్లో త‌న ఈజ్ ర‌కుల్ కంటే బెట‌ర్ అని గ్ర‌హించిన చిత్ర‌బృందం… చివ‌రికి త‌మ‌న్నా కే ఓటు వేశారు. ప్ర‌త్యేక గీతాల కోసం త‌మ‌న్నా రెమ్యున‌రేష‌న్ ఎప్పుడూ ప్ర‌త్యేకంగా ఉంటుంది. రూ.60 ల‌క్ష‌ల‌కు ఒక్క‌రూపాయి త‌గ్గ‌దు. ఈసారీ అంతే కోడ్ చేసింద‌ట‌. త‌మ‌న్నా కాల్షీట్లు ఇంకా ఖ‌రారు కాలేద‌ని, ఖ‌రారైన వెంట‌నే.. ఈ పాట‌ని హైద‌రాబాద్‌లో ప్ర‌త్యేకంగా తీర్చిదిద్దిన ఓ సెట్లో తెర‌కెక్కిస్తామ‌ని చిత్ర‌బృందం చెబుతోంది. 100% ల‌వ్, త‌డాఖా చిత్రాల్లో జంట‌గా న‌టించారు చైతూ, త‌మ‌న్నా. ఈసారి హ్యాట్రిక్ కొట్ట‌బోతున్నార‌న్న‌మాట‌.