స్టార్ హీరోల సినిమాలు కూడా ఒక్కోసారి సోలో రిలీజులు దొరకడం కష్టమవుతోంది. ఇక కమెడియన్ హీరోగా నటించిన సినిమాలకు సోలో రిలీజ్ డేట్ ఎక్కడ సెట్ అవుతుంది? ఏదో ఒక వారాన్ని రెండు మూడు చిన్న సినిమాలతో పంచుకోవలసిందే. పెద్ద సినిమాలతో వస్తే మినిమమ్ ఓపెనింగ్స్ రాబట్టుకునే అవకాశాన్ని కోల్పోతామని ఓ మాదిరి సినిమాలతో రిలీజ్ డేట్ పంచుకునే స్ట్రాటజీ అమలు పరుస్తారు. కానీ, కమెడియన్ నుంచి హీరోగా మారి అప్పుడప్పుడూ తనకు సూటయ్యే కథలు వచ్చినప్పుడు హీరోగా సినిమాలు చేసే శ్రీనివాసరెడ్డి మాత్రం భారీ సినిమాలతో బాక్సాఫీస్ బరిలో దిగేందుకు రెడీ అవుతున్నాడు. అతను హీరోగా నటించిన లేటెస్ట్ సినిమా ‘జంబలకిడి పంబ’. ఈ సినిమాను జూన్ 14న విడుదల చేస్తున్నట్టు ప్రకటించారు.
తమిళ తలైవా, సూప‌ర్‌స్టార్‌ రజనీకాంత్ నటించిన ‘కాలా’ జూన్ 7న థియేటర్లలోకి వస్తోంది. రజనీ సినిమా అంటే తెలుగులో స్టార్ హీరోల సినిమాతో సమానమే. హిట్టయితే రెండు మూడు వారాలు థియేటర్ల దగ్గర సినిమాకు అడ్డు అనేది వుండదు. ‘కాలా’ వచ్చిన వారానికి.. అంటే జూన్ 14న నందమూరి క‌ల్యాణ్‌రామ్‌ హీరోగా నటించిన ‘నా నువ్వే’ వచ్చేస్తుంది. ఇందులో తమన్నా హీరోయిన్. ఆల్రెడీ రిలీజైన పాటలు, ప్రచార చిత్రాలు, ముఖ్యంగా తమన్నా హాట్ హాట్ స్టిల్స్‌ ఆడియన్స్‌లో ఇంట్రెస్ట్ క్రియేట్ చేశాయి. రెండో వారంలో ‘కాలా’ కొన్ని థియేటర్లలో వుంటుంది. క‌ల్యాణ్‌రామ్‌ ‘నా నువ్వే’కి చెప్పుకోదగ్గ సంఖ్యలో థియేటర్లు దక్కుతాయి. ఈ సినిమా రిలీజైన నెక్స్ట్ డే ఇంద్రగంటి మోహనకృష్ణ దర్శకత్వం వహించిన ‘సమ్మోహనం’ రిలీజ్. మహేశ్‌బాబు బావ సుధీర్‌బాబు, హిందీ హీరోయిన్ అదితిరావు హైదరి జంటగా నటించిన ఈ సినిమాను తీసి పారేయడానికి వీల్లేదు. వీటి మధ్య జూన్ 14న శ్రీనివాసరెడ్డి ‘జంబలికిడి పంబ’ రిలీజ్‌కి రెడీ అయ్యింది. దాంతో స్టార్ కమెడియన్‌కి అంత ధైర్యం ఏంటబ్బా? అని ట్రేడ్ వర్గాలు ఆశ్చర్యపోతున్నాయి.
బెల్లంకొండ సాయిశ్రీనివాస్, పూజా హెగ్డే జంటగా నటిస్తున్న ‘సాక్ష్యం’ సినిమాని జూన్ 14న రిలీజ్ చేయాలని ప్లాన్ చేశారు. సీజీ వర్క్స్ కారణంగా ఆ సినిమా వాయిదా పడటంతో సడన్‌గా శ్రీనివాసరెడ్డి లైన్‌లోకి వచ్చాడు. ఫుల్ లెంగ్త్ కామెడీ ఎంట‌ర్‌టైన‌ర్‌గా రూపొందిన ఈ సినిమాపై యూనిట్ అంతా ధీమాగా వున్నార్ట.
