తిరుమల తిరుపతి దేవస్థానాలను వివాదాలు విడిచి పెట్టడం లేదు. మహాసంప్రోక్షణను ప్రత్యక్ష ప్రసారం చేయాలంటూ.. హైకోర్టులో దాఖలైన పిటిషన్ టీటీడీకి కొత్త తలనొప్పుకు తెచ్చిపెడుతోంది. ప్రతి పన్నెండేళ్లకోసారి చేసే మహాసంప్రోక్షణ కార్యక్రమాన్ని ప్రత్యక్ష ప్రసారం చేసేలా ఆదేశించాలంటూ కొందరు వ్యక్తులు ఇటీవల హైకోర్టులో పిటిషన్ వేశారు. ఆలయ వ్యవహారాలలో కోర్టు జోక్యం చేసుకోదంటూనే ప్రత్యక్ష ప్రసారం చేయ్యడానికి వున్న ఇబ్బందులు తెలియజేయాలని హైకోర్టు టీటీడిని ఆదేశించింది.మహా సంప్రోక్షణను ప్రత్యక్ష ప్రసారం చేయడానికి ఆగమాలు ఒప్పుకోవని..వెండి వాకిలి దాటి కెమెరాలకు అనుమతి లేదని టీటీడీ కోర్టుకు తెలిపింది. అయితే పిటిషనర్లు మరింత తెలివిగా వ్యవహరించారు. అరవై ఏళ్ల కింద జరిగిన ప్రత్యక్ష ప్రసారం జరిగిందంటూ… కొన్ని ఆధారాలను కోర్టుకు సమర్పించారు.

1958లో జరిగిన మహాసంప్రోక్షణ కార్యక్రమాని ప్రత్యక్ష ప్రసారం చేశారని అప్పట్లో లేని ఇబ్బందులు ఇప్పడు ఏమిటని పిటిషనర్ కోర్టు దృష్టికి తీసుకెళ్లారు. దీంతో హైకోర్టు మరో సారి టీటీడిని కౌంటర్ దాఖలు చేయాలని ఆదేశించింది. హైకోర్టు ఆదేశాలతో టీటీడీ యంత్రాంగం ఆగమ పండితులు, ప్రధాన అర్చకులతో సమావేశం నిర్వహించి హైకోర్టు ఆదేశాలను వారికి తెలియజేసి వారి అభిప్రాయాలను తీసుకొంది. ఆగమపండితులు మాత్రం ప్రత్యక్ష ప్రసారం ఆంశంపై తీవ్ర అభ్యంతరం తెలిపారు. ప్రత్యక్ష ప్రసారం చేయ్యడం ఆగమ విరుద్దమని….శ్రీవారి ఆలయంలోని వెండి వాకిలి దాటి కెమెరాలకు ప్రవేశం లేదని తేల్చి చెప్పారు. 1958వ సంవత్సరంలో జరిగిన ఘటనకు ఆ వెంటనే ప్రాయశ్చిత్తాన్ని కూడా నిర్వహించారని టీటీడీ అధికారులకు ఆగమ పండితులు తెలిపారు.

ప్రస్తుతం టీటీడీ అధికారుల పరిస్ధితి ఆగమగోచరంగా మారింది. ఎలాంటి నిర్ణయం తీసుకోవాలో అర్ధం కాక…తలలు పట్టుకుంటు్నారు. ఆగమ పండితుల నిర్ణయాన్నే హైకోర్టుకు తెలియజేయాలని నిర్ణయించారు. హైకోర్టు ప్రత్యక్ష ప్రసారం చేయమంటే తప్పకుండా కోర్టు ఆదేశాలను పాటిస్తామని కూడా కౌంటర్ లో చెప్పేందుకు సిద్ధమయ్యారు. ఒక వేళ హైకోర్టు ప్రత్యక్ష ప్రసారం చేయమని ఆదేశిస్తే ఆగమపండితులు ఎలా స్పందిస్తారోనన్న టెన్షన్ టీటీడీకి పట్టుకుంది.