కొండా సురేఖ కాంగ్రెస్ పార్టీలో చేరిపోవడం ఖాయమవడంతో.. వరంగల్ తూర్పు నియోజకవర్గంలో టీఆర్ఎస్ టిక్కెట్ కోసం పోటీ పెరిగింది. మొత్తం ఉమ్మడి వరంగల్ జిల్లాలోని 12 స్థానాల్లో 11 స్థానాలకు కేసీఆర్ అభ్యర్థులను ప్రకటించారు. కొండాసురేఖకు టిక్కెట్ నిరాకరించడంతో టికెట్ మాకంటే మాకు అంటూ ఎవరికి వారు ప్రచారం మొదలు పెట్టేశారు. కొందరు సీనియర్లు కాగా.. కొందరు కనీసం కార్పొరేటర్ గా పనిచేసిన అనుభవం లేని వారు ఉన్నారు. బీసీ నియోజకవర్గంగా పేరున్న తూర్పులో బీసీ నేతలకే టికెట్ దక్కుతుందని టీఆర్ఎస్ వర్గాలు చెబుతున్నాయి. ఈ విషయంలో కేసీఆర్ ఇప్పటికే పార్టీ నేతలకు సూచనలు పంపారు.

పోచంపల్లి శ్రీనివాసరెడ్డి అనే నేత టిక్కెట్ కోసం.. ప్రయత్నించగానే.. తూర్పు టికెట్ బీసీలకే అని చెప్పేశారట. కొండాసరేఖ వంటి నేత స్థానాన్ని భర్తీ చేయాలంటే ఆ స్థాయి నేతలు కూడా కావాలని కేసీఆర్ భావిస్తున్నారు. ఇప్పటికే మూడు సర్వేలు చేయించారు. మాజీ మంత్రి బస్వరాజ్ సారయ్య, మేయర్ నరేందర్, గుండుసుధారాణిలు తొలి మూడు స్థానాల్లో ఉన్నారు. ఎర్రబెల్లి ప్రదీప్ రావు కు నాలుగోస్థానం దక్కింది. అయినప్పటికీ ప్రదీప్ రావు తన ప్రచారం మొదలుపెట్టారు. టికెట్ రాకపోతే ఇండిపెండెంట్ గా నైనా పోటీ చేస్తానంటూ చెబుతున్నారట. ఇక తమ నేతలకు టికెట్ ఇవ్వాలంటూ కోరుతున్న వారిలో గుడిమెల్ల రవికుమార్ అనే నేత ముందు ఉన్నారు. ఉద్యమ సమయం నుంచి పార్టీని నమ్ముకుని ఉన్నందున.. అవకాశం ఇవ్వాలంటూ ఆయన అనుచరులు భారీ ర్యాలీలు చేపడుతున్నారు. కేసీఆర్ కుటుంబానికి సంబంధించి విధేయత కనబర్చే గుడిమెల్ల విషయంలో కేసీఆర్ కు కూడా కొంత సానుభూతి ఉందని చెబుతున్నారు. 2015లో వరంగల్ ఎంపీ బై ఎలక్షన్స్ లో చివరి నిముషంలో కులవివాదంతో టికెట్ అవకాశం చేజార్చుకున్న గుడిమెల్లకు ఆతర్వాత ఇచ్చిన నామినేటెడ్ చైర్మన్ పదవి కూడా న్యాయపరమైన చిక్కులతో పోయింది.

ఉద్యమకారులకు టికెట్లు ఇవ్వాలంటూ కొంత మంది ప్రచారం చేస్తున్నారు. ఇప్పటివరకు ఉద్యమకారులైన విద్యార్థుల్లో టికెట్లు పొందిన వారు అందరూ ఎస్సీలేనని, తాను బీసీ విద్యార్థిగా ఉద్యమం ప్రారంభం నుంచి ఎన్నో లాఠీ దెబ్బలు తిని తెలంగాణ సాధించడంలో భాగస్వామినయ్యానంటూ విద్యార్థి నేత రాజ్ కిషోర్ టిక్కెట్ కోరుతున్నారు. ప్రస్తుత కార్పొరేటర్లుగా ఉన్న గుండా ప్రకాశ్ రావు వైశ్యసంఘం నుంచి, వద్దిరాజు గణేశ్ బ్రాహ్మణ సంఘం నుంచి ప్రయత్నాలు చేసుకుంటున్నారు. మొత్తంగా బస్వరాజు సారయ్యకు లేకపోతే.. గుడిమెల్ల రవికుమార్‌కు మాత్రం… ఎక్కువ అవకాశాలున్నాయన్న ప్రచారం వరంగల్ తూర్పు టీఆర్ఎస్‌లో జరుగుతోంది.