సూపర్ స్టార్ మహేష్ శ్రీమంతుడు సినిమాతో నిర్మాణ రంగంలోకి కూడా అడుగుపెట్టిన సంగతి తెలిసిందే. తన ఎం.బి ఎంటర్టైన్మెంట్ బ్యానర్లో ప్రస్తుతం తన సినిమాలకు సహ నిర్మాతగా వ్యవహరిస్తున్న మహేష్ ఇక సోలోగా కూడా సినిమాలను తీసేందుకు సిద్ధమవుతున్నాడట. ఇన్నాళ్లకు భలే మంచి రోజుతో సోలో హిట్ కొట్టిన బావ సుధీర్ బాబుతోనే తన మొదటి సినిమా నిర్మించేలా ప్లాన్ చేస్తున్నాడట మహేష్.
ఇటీవల ఓ షోలో పాల్గొన్న సుధీర్ బాబు ఈ విషయాలను వెళ్లడించారు. అయితే ఆ సినిమా ఎవరి దర్శకత్వంలో వస్తుంది అన్నది ఇంకా తెలియలేదు. ప్రస్తుతం సూపర్ స్టార్ గా వరుసెంట సినిమాలను చేస్తున్న మహేష్ అటు స్టార్ హీరోగా చేస్తూనే చిన్న సినిమాలను నిర్మించే బాధ్యత నెత్తిన వేసుకుంటున్నాడు. తన సినిమాల నిర్మాణ బాధ్యతలు మహేష్ అర్ధాంగి నమ్రతా చూసుకోనుందట. ప్రస్తుతం బ్రహ్మోత్సవం చేస్తున్న మహేష్ ఆ సినిమా షూటింగ్ లో బిజీగా ఉన్నాడు. ఇక ఈ సినిమా తర్వాత మురుగదాస్ దర్శకత్వంలో ఓ సినిమా చేసే ప్లాన్ లో ఉన్నాడు మహేష్.
ప్రస్తుతం ట్రెండ్ క్రియేట్ చేస్తున్న చిన్న సినిమాలకు పెద్ద హీరోల కన్ను పడటం విశేషం. ఇప్పటికే అల్లు అరవింద్ గీతా ఆర్ట్స్ సెకండ్ బ్యానర్ నుండి చిన్న సినిమాలు చేస్తుండగా.. రాం చరణ్ కూడా కొణిదెల ఎంటర్ టైన్మెంట్ బ్యానర్ లో స్టార్ హీరోల సినిమాలతో పాటుగా చిన్న సినిమాలను కూడా తీసి ఔత్సాహిక కళాకారులను ఎంకరేజ్ చేసే పనిలో ఉన్నాడు.
