తెలంగాణ కాంగ్రెస్ నాయకుడు, పవన్ కల్యాణ్ భక్తుడు బండ్ల గణేష్.. ఎమ్మెల్యే అయిపోయినట్లేనని..నిన్నామొన్నటి వరకూ అనుకున్నారు. ప్రమాణ స్వీకారం సందర్భంగా చేయాల్సిన ప్రమాణాన్ని బట్టీ పట్టారు. దాన్ని టీవీ చానళ్లలో యాంకర్లకు… ఆ పాఠాన్ని అప్పజెప్పారు కూడా. అంతగా.. ఎమ్మెల్యే అయిపోవడానికి ప్రిపేరయిపోయిన బండ్ల గణేష్ కు ఇప్పుడు పెద్ద చిక్కు వచ్చి పడింది. ఎమ్మెల్యే అవ్వాలంటే.. పోటీ చేయాలి.. పోటీ చేయాలంటే.. టిక్కెట్ కావాలి.. ఇప్పుడా ఆ టిక్కెట్టే రావడం లేదు. గాడ్ పవన్ కల్యాణ్ ని వదిలేసి… గాడ్ ఫాదర్లను పట్టుకుని… రాహుల్ గాంధీతో కాంగ్రెస్ కండువా కప్పించుకుని… ఇక పోటీనే అనుకుంటున్న సమయంలో .. ఢిల్లీ నుంచి వరుసగా వస్తున్న జాబితాల్లో తన పేరు కనిపించడం లేదు.
మొదటగా జూబ్లీహిల్స్ అనుకున్నారు. అక్కడ కలసి రాదని.. అనుకున్నారో… గాడ్ ఫాదర్లు సలహా ఇచ్చారో కానీ.. రాజేంద్రనగర్ అన్నారు. టిక్కెట్ కన్ఫర్మ్ చేసుకోవడానికి… చాలా సార్లు ఢిల్లీ వెళ్లారు. టీడీపీ అధినేత వస్తే కలిశారు. రాజేంద్రనగర్ తనకు రాసి పెట్టి ఉందని..పొత్తులో భాగంగా టీడీపీకి అడగవద్దని.. ఓ విజ్ఞాపన పత్రం కూడా ఇచ్చేశారు. చంద్రబాబు దాన్ని చూశారో లేదో కానీ… రాజేంద్రనగర్ టీడీపీకే వచ్చింది. అక్కడ్నుంచి మరో గణేష్ ను.. అంటే గణేష్ గుప్తాను అభ్యర్థిగా ప్రకటించింది. దీంతో బండ్ల గణేష్ హర్టయ్యాడు. అయినా… బండ్ల గణేష్ తనకు తాను… మీడియా చానళ్లలో తిరగి… ఎమ్మెల్యే అభ్యర్థినని ప్రచారం చేసుకోవడమే కానీ.. ఎక్కడా… ఆయన ఫలానా చోట రేసులో ఉన్నారన్న ప్రచారమే జరగలేదు. సామాజికవర్గ కోటాలో ఆయన కోసం… ఆయనకు గాడ్ ఫాదర్ భావిస్తున్న చానల్ యజమాని.. ప్రయత్నం చేసినా.. పట్టించుకున్న పాపాన పోలేదు.
అసలు పరిశీలనకే బండ్ల గణేష్ పేరు వెళ్లలేదని.. ఏఐసిసి వర్గాలు చెబుతున్నాయి. అయినా బండ్ల గణేష్ కు ఆశలు తీరలేదు. ఏదో ఒక చోట పోటీ చేయాలనే తలంపుతో మిగిలిన సీట్లలో అయినాచోటు దొరుకుతుందేమోనని ప్రయత్నాలు చేస్తున్నారు. కానీ అందరూ ఆయనను పొలిటికల్ కమెడియన్ గానే చూశారు. ఎవరూ పట్టించుకోలేదు. గాడ్ ఫాదర్ల వల్ల కాలేదు కాబట్టి.. ఇక నేరుగా గాడ్ వద్దకు వెళ్తారేమో..?
