భారతీయ జనతా పార్టీ పరిస్థితి ఎంత దారుణంగా ఉందో చెప్పే రాజకీయ ఘటన ఇది. అంతులేని అధికారం అనుభవిస్తున్నప్పుడు…తిరుగులేదని అనుకుంటున్న సమయంలో వివిధ రాష్ట్రాల్లోని మిత్రపక్షాలను.. అమాంతం మింగేసి.. తాను బలపడాలనే ప్రయత్నాలకు.. ఇప్పుడు.. రివర్స్ ఎటాక్‌లు ఎదురవుతున్నాయి. దశాబ్దాలుగా మిత్రపక్షంగా ఉన్న శివసేన సైతం బీజేపీకి దూరం జరిగింది. బీజేపీతో పొత్తు లేదని చెబుతోంది. కానీ బీజేపీ మాత్రం.. శివసేనతో పొత్తు లేకపోతే.. మహారాష్ట్రలో ఖర్చైపోతామని.. భయపడుతోంది. ఒకప్పుడు… ఒకే భావజాలం ఉన్న ఆ పార్టీని లేకుండా చేస్తే..మహారాష్ట్రలో తాము మాత్రమే కింగ్‌లుగా ఉంటామనుకునుకున్నారు. కానీ ఇప్పుడు మాత్రం.. పొత్తుల కోసం కాళ్ల మీద పడిపోవడానికి రెడీ అయిపోయింది.
శివసేనను కబళించే ప్రయత్నాలు, మోడీ, అమిత్ షా చేసినట్లు తెలిసిన వెంటనే.. ఆ పార్టీ బీజేపీకి దగ్గరగా దూరంగా… వ్యవహరించడం ప్రారంభించారు. కేంద్ర ప్రభుత్వం, మహారాష్ట్ర ప్రభుత్వాల్లో భాగస్వామిగా ఉన్నప్పటికీ… ప్రతిపక్ష నేతలను మించి బీజేపీపై విమర్శలు చేస్తున్నారు. ఒంటరి పోటీకి రెడీ అయ్యామని.. బీజేపీతో పొత్తు ఉండదని.. చాలా కాలంగా చెబుతూ వస్తున్నారు. పార్టీలో అధికారికంగా తీర్మానం కూడా చేశారు. ఎన్నికలు దగ్గర పడుతున్న సమయంలో… ఎలాగైనా శివసేనను మచ్చిక చేసుకోవాలన్న ఉద్దేశంతో బీజేపీ.. కొత్త కొత్త నిర్ణయాలు తీసుకుంటోంది. ముంబైలో నిర్మిస్తున్న బాల్‌థాకరే మెమోరియల్ నిర్మాణానికి ప్రభుత్వం తరపున రూ. 100 కోట్లు కేటాయిస్తూ నిర్ణయం తీసుకున్నారు. ఈ వంద కోట్లతో అయినా శివసేన మనసు మారుతుందని ఆశించింది. అయితే.. రూ. బాల్ థాకరే మెమోరియల్‌కు రూ. వంద కోట్లు ఇవ్వడాన్ని స్వాగతించిన శివసేన.. పొత్తుల విషయంలో.. మార్పేమీ లేదని.. బీజేపీతో కలిసి పోటీ చేసే ఆలోచనే చేయడం లేదని ప్రకటించి షాక్ ఇచ్చింది.
అయితే.. ఈ షాక్‌లోనూ ఓ ట్విస్ట్ ఇచ్చింది శివసేన. మోడీని ప్రధానమంత్రి అభ్యర్థిగా కాకండా… నితిన్ గడ్కరీని ప్రధానమంత్రి అభ్యర్థిగా ప్రకటిస్తే.. మద్దతు గురించి ఆలోచిస్తామని చెప్పింది. అంటే.. ఇక్కడా నేరుగా ఇస్తామని చెప్పలేదు. కానీ… ఆలోచిస్తామన్నది. అంటే.. ఇచ్చినా.. ఇవ్వకపోయినా… ఇది బీజేపీలో ఓ రకంగా చిచ్చు పెట్టే వ్యవహారమే. మోడీ, షాలు… ఇప్పటికే గడ్కరీపై అనుమానం చూపులు చూస్తున్నారు. కొత్తగా.. శివసేన కూడా.. గడ్కరీనే ప్రమోట్ చేసే ప్రయత్నం చేస్తూండటంతో.. వారికి నిద్రపట్టని పరిస్థితులు ఏర్పడుతున్నాయి. వచ్చే ఎన్నికల తర్వాత మిత్రపక్షాలకే కీలకం కాబోతున్న తరుణంలో శివసేన వైఖరి వారికి ఆందోళన కలిగించేదే మరి..!
