ఉద్యోగం సజ్జోగం లేని యువత అందరూ తప్పకుండా `చిత్రలహరి` చిత్రంతో కనెక్ట్ అవుతారని సాయిధరమ్ తేజ్ అంటున్నారు. ఓ తండ్రి, అతని కుమారుడి చుట్టూ చిత్రకథ తిరుగుతుందని ఆయన తెలిపారు. ఎమోషనల్ ఎంట‌ర్‌టైన‌ర్‌గా తెర‌కెక్కుతోన్న‌ ఈ సినిమా తనను విమర్శిస్తున్న వారందరికీ సమాధానం చెబుతుందని లేటెస్ట్ ఇంటర్వ్యూలో సాయిధరమ్ తేజ్ గట్టిగా చెప్పారు.

`సుప్రీమ్` చితం తరవాత సాయిధరమ్ తేజ్ కెరీర్‌లో ఒక్క హిట్ కూడా లేదు. ఫ్లాపుల్లో డ‌బుల్ హ్యాట్రిక్‌ నమోదు చేయడంతో `చిత్రలహరి`కి ముందు కొంత విరామం తీసుకున్నాడు. ప్లాపులకు ఎవరినీ నిందించడం లేదని సాయిధరమ్ తేజ్ స్పష్టం చేశారు. ప్రతి సినిమా కథ తెలిసే చేశానని, కొన్ని మంచి కథలు తెరపైకి సరిగా రాలేదని, మరికొన్ని సినిమాలు ఇచ్చిన మాటకు కట్టుబడి చేశానని మెగా మేనల్లుడు అన్నారు. మెగాస్టార్ ఇమేజ్ డెబ్యూ సినిమాకు ఉపయోగపడుతుందని, మెగా ఫ్యామిలీ నుంచి వచ్చే వారందరూ ఎవరికీ వారు నిరూపించుకోవాలన్నారు. “నాకు యాక్టింగ్ మాత్రమే తెలుసు. సినిమాల్లోనే కొనసాగుతా. ఇండస్ట్రీలో ఫ్రస్ట్రేషన్ వచ్చిన సందర్భాలు వున్నాయి. నా సినిమా ఫెయిల్ అయితే ఏం చేయాలనే విషయంలో ప్లాన్ బి, ప్లాన్ సి లేవు” అని సాయిధరమ్ తేజ్ అన్నారు.