లక్ష్మీస్ ఎన్టీఆర్ సినిమా ఏపీలో ఎన్నికలకు ముందు విడుదలయ్యే సూచనలు కనిపించడం లేదు. దీనికి సంబందించి హైకోర్టులో నిర్మాతలు దాఖలు చేసిన కేసుపై.. విచారమను… ఈనెల 9వ తేదీకి హైకోర్టు వాయిదా వేసింది. సుప్రీంకోర్టులో ఇదే కేసు పెండింగ్‌లో ఉన్నందున… తీర్పు చెప్పలేమని హైకోర్టు ధర్మాసనం స్పష్టం చేసింది. సినిమా ప్రివ్యూ కూడా చూడలేమని తెలిపింది. విడుదలకు ఒక్క రోజు ముందు.. తమ సినిమాకు ఆటంకాలు లేకుండా విడుదలయ్యేలా చూడాలంటూ నిర్మాతలు కోర్టుకు వెళ్లారు. అంతకు ముందు మంగళగిరి కోర్టు.. సినిమాను విడుదల నిలిపివేయాలని ఆదేశించింది. హైకోర్టు నిర్మాతల పిటిషన్ చూసి… సినిమా చూసిన తర్వాత నిర్ణయిస్తామని తెలిపింది. మూడో తేదీకి వాయిదా వేసింది. అయితే.. ఈ నిర్ణయంపై సుప్రీంకోర్టుకు వెళ్తామని చెప్పిన నేతలు..మూడు రోజుల తర్వాత సుప్రీంకోర్టులో పిటిషన్ వేశారు.

అత్యవసరంగా విచారించాలని కోరారు. సుప్రీంకోర్టు.. అత్యవసరంగా విచారించాల్సిన అవసరం లేదని తేల్చి.. పిటిషన్ ను వాయిదా వేసింది. వచ్చే వారం విచారణకు వచ్చే అవకాశం ఉంది. అయితే.. ఈ లోపే.. హైకోర్టులో పిటిషన్ వాయిదా గడువు వచ్చింది. విచారణ జరిపిన హైకోర్టు.. సుప్రీంకోర్టులో విచారణలో ఉన్నందున తామెలాంటి తీర్పు ఇవ్వలేమని స్పష్టం చేసింది. దాంతో నిర్మాతలు మళ్లీ .. సుప్రీంకోర్టు విచారణ వరకూ వెయిట్ చేయాల్సి ఉంది. సుప్రీంకోర్టు నిర్ణయం వచ్చిన తర్వాతనే ఏపీలో లక్ష్మీస్ ఎన్టీఆర్ విడుదల కానుంది. పదకొండో తేదీన పోలింగ్ కు ముందే సినిమాను విడుదల చేయాలన్నది.. నిర్మాతల లక్ష్యం. అది నెరవేరే అవకాశం కనిపించడం లేదు.

విడుదల చేసుకోవడం ఇష్టం లేకనే.. లక్ష్మీస్ ఎన్టీఆర్ నిర్మాతలు సుప్రీంకోర్టుకు వెళ్లారన్న ప్రచారం జరుగుతోంది. ఇప్పటికే తెలంగాణతో పాటు ఓవర్సీస్ లో విడుదలైన సినిమా బాక్సాఫీస్ దగ్గర పరాజయం పాలైంది. ధియేటర్లకు రెంట్ ఎదురు కట్టాల్సిన పరిస్థితి ఏర్పడింది. ఇప్పుడు ఏపీలో విడుదల చేసినా.. చూసేవాళ్లు ఎవరూ ఉండరని చెబుతున్నారు. అన్ని పార్టీల కార్యకర్తలు ప్రచారంలో బిజీగా ఉన్నారు. సామాన్య సినీ ప్రేక్షకులు ఇలాంటి సినిమాలపై ఆసక్తి చూపరు. అందుకే విడుదల చేయకూడదన్న కారణంగానే సుప్రీంకోర్టుకు వెళ్లి సక్సెస్ అయ్యారన్న విమర్శలు వైసీపీ నేతలు చెబుతున్నారు.