ఈవీఎంల పనితీరుపై చాలా అనుమానాలున్నాయన్నారు ఏపీ ముఖ్యమంత్రి నారా చంద్రబాబు నాయుడు. విపక్షాలతో ఢిల్లీలో జరిగిన సమావేశంలో ఆయన పాల్గొన్నారు. ఏపీలో ఎన్నికలు నిర్వహించిన తీరును వివరించారు. కాంగ్రెస్ నేత అభిషేక్ మనుసింఘ్వీతోపాటు, కపిల్ సిబల్, అరవింద్ కేజ్రీవాల్, సురవరం సుధాకర్ రెడ్డితోపాటు ఇతర పార్టీలకు చెందిన ప్రముఖ నేతలు హాజరయ్యారు. చంద్రబాబు మాట్లాడుతూ… తానేదో ఓడిపోతాన్న భయంతోనే ఢిల్లీకి వచ్చాననీ, ఇవన్నీ చేస్తున్నానని కొందరు విమర్శిస్తున్నారన్నారు. ‘రెండొందల శాతం ధీమాతో చెప్తున్నా.. మేం గెలుస్తున్నా’మన్నారు. తెల్లారుజాము నాలుగున్నర వరకూ ప్రజలు ఓట్లు వేశారంటే… అది కేంద్రంపై, ఎన్నికల నిర్వహిస్తున్న తీరుపై వారు వ్యక్తం చేసిన ఆగ్రహమే అన్నారు.
ఎన్నికల్ని ఎదుర్కొనలేకే తాను ఈ పనిలోపడ్డానంటూ కొంతమంది విమర్శలు చేస్తున్నారనీ, ఆంధ్రాలో ఎన్నికలు అయిపోయాయని చంద్రబాబు చెప్పారు. ఇప్పుడు తాను పని చేస్తున్నది దేశం కోసం అన్నారు. రాజ్యాంగాన్ని కాపాడుకోవడం, తద్వారా దేశాన్ని కాపాడుకోవడం కోసం ఇప్పుడీ పని చేస్తున్నా అన్నారు. రాజ్యాంగాన్ని పరిరక్షించాలన్న లక్ష్యంతో పార్టీలన్నీ గత కొన్నాళ్లుగా ఈ పోరాటం చేస్తున్నాయన్నారు. జర్మనీ, నెథర్లాండ్స్, ఐర్లాండ్ ఇలాంటి చాలా దేశాలు ఈవీఎంల నుంచి మళ్లీ బేలెట్ పద్ధతికి వెళ్లాయన్నారు. తెలంగాణలో 25 లక్షలు ఓట్లు తీసేస్తే, తాము కోర్టుకు వెళ్లినా సరైన స్పందన లేదనీ, చివరికి, ఈసీ సారీ చెప్పి తప్పించుకునే ప్రయత్నం చేశారన్నారు. 23 పార్టీలన్నీ చేస్తున్న డిమాండ్ ఒక్కటేననీ… కనీసం ఇప్పుడైనా 50 శాతం వీవీప్యాట్ స్లిప్పులను లెక్కించాలని కోరుతున్నామన్నారు. కానీ, స్లిప్పుల లెక్కించడానికి ఆరురోజులు పడుతుందని కోర్టును కూడా తప్పుతోవ పట్టిస్తున్నారన్నారన్నారు.
అనంతరం, ఢిల్లీ ముఖ్యమంత్రి అరవింద్ కేజ్రీవాల్, సీనియర్ నేత కపిల్ సిబల్, సీపీఐ నేత సురవరం సుధాకర్ రెడ్డి మాట్లాడారు. అందరి డిమాండ్… ఈవీఎంలపై నమ్మకం లేదనీ, కనీసం 50 శాతం వీవీప్యాట్లను లెక్కించాలని. భాజపాకి అనుకూలంగా ఉన్న ప్రాంతాల్లో ఇలాంటి సమస్యలు ఎందుకు రావడం లేదని. ఈవీఎంలపై దేశంలో 23 పార్టీలకు పూర్తిస్థాయి నమ్మకం లేదంటూ ఒక వేదిక మీదికి వచ్చినప్పుడు… దాన్ని తగ్గ సమాధానం, పరిష్కార మార్గం అన్వేషించాల్సిన అవసరం ఉంది. ఈ సమస్యని కేంద్రం ఈజీగా తీసుకోవచ్చు. కానీ, ఆ తీరు ప్రజలు ఈజీగా తీసుకోరు కదా.
