హీరో పాత్ర‌ల‌పై మోజు త‌గ్గించుకుని, ఇప్పుడిప్పుడే త‌న‌కు సూట‌య్యే కామెడీ వేషాలు వేసుకుంటున్నాడు సునీల్‌. త‌న చేతిలోనూ అవ‌కాశాలు బాగానే ఉన్నాయి. ఈ ద‌శ‌లో మ‌ళ్లీ త‌న‌కు హీరోగా ఛాన్సులొస్తున్నాయి. అయితే సునీల్ ఏం కంగారు ప‌డిపోవ‌డం లేదు. ఇది వ‌ర‌కు అడ్వాన్సులు తీసుకున్న ఒక‌రిద్ద‌రు నిర్మాత‌ల‌కే త‌ను సినిమాలు చేయాల‌ని డిసైడ్ అయ్యాడు. అయితే ఇప్పుడు సునీల్‌కి అనుకోకుండా బాలీవుడ్ నుంచి ఆఫ‌ర్ వ‌చ్చింది. అక్క‌డ రూపొందే ఓ మ‌ల్టీస్టార‌ర్ చిత్రంలో సునీల్‌కి ఛాన్సొచ్చింది. ఈ చిత్రానికి తాతినేని ప్ర‌సాద్ ద‌ర్శ‌కత్వం వ‌హిస్తారు. స‌న్నీలియోన్‌, బ్ర‌హ్మానందం లాంటి స్టార్లు కూడా ఈ మ‌ల్టీస్టార‌ర్‌లో క‌నిపిస్తార‌ని తెలుస్తోంది. మ‌రో ఇద్ద‌రు బాలీవుడ్ సూప‌ర్ క‌మిడియ‌న్ హీరోలు ఈ సినిమాలో కీల‌క పాత్ర‌లు పోషిస్తార‌ని స‌మాచారం. సునీల్‌కి కూడా ఎప్ప‌టి నుంచో బాలీవుడ్‌లో ఓ సినిమా చేయాల‌ని వుంది. మంచి ఆఫ‌ర్ కోసం ఎదురుచూస్తున్నాడు. ఇప్పుడు ఈ అవ‌కాశాన్ని రెండు చేతులా అందిపుచ్చుకున్నాడ‌ని, బాలీవుడ్‌లో న‌టించ‌డానికి ఒప్పుకున్నాడ‌ని తెలుస్తోంది. అయితే… ఇంకా డేట్లు స‌ర్దుబాటు చేయ‌లేదు. త్వ‌ర‌లోనే వాటిపైనా ఓ క్లారిటీ వ‌చ్చే అవ‌కాశం ఉంది.