యువ హీరోలు తెలివిగా ఆలోచిస్తున్నారు. నాలుగు డ‌బ్బులు ఉండ‌గానే ఇల్లు చ‌క్క బెట్టుకోవాల‌నుకుంటున్నారు. దాదాపు ప్ర‌తీ హీరోకీ ఓ సొంత ప్రొడ‌క్ష‌న్ హౌస్ ఉంది. సుధీర్ బాబు, సందీప్ కిషన్ ఇద్ద‌రూ ఇటీవ‌లే సొంత సంస్థ‌లు స్థాపించారు. వెంక‌టాద్రి ప్రొడ‌క్ష‌న్ పేరుతో సందీప్ కిష‌న్ ‘నిను వీడ‌ని నీడ‌ను నేనే’ సినిమాని ప్రొడ్యూస్ చేశాడు. సుధీర్ బాబు కూడా త‌న ప్రొడ‌క్ష‌న్‌లో సినిమా ఇది వ‌ర‌కే తీసేశాడు. అయితే వీరిద్ద‌రూ ఇప్పుడో మాట ఇచ్చి పుచ్చుకున్నారు. సందీప్ నిర్మాత‌గా సుధీర్ ఓ సినిమా చేయ‌డానికి, సుధీర్ నిర్మాత‌గా సందీప్ క‌థానాయ‌కుడిగా ఓ సినిమా చేయ‌డానికి ఫిక్స‌య్యారు. అంతే కాదు… మ‌రో యువ హీరో నిఖిల్ వీరిద్ద‌రి ప్రొడ‌క్ష‌న్‌లో ఫ్రీగా సినిమా చేస్తాన‌ని మాట ఇచ్చాడు. మ‌రో విశేషం ఏమిటంటే.. ఈ ముగ్గురూ క‌ల‌సి ఓ సినిమా చేయ‌బోతున్నార్ట‌. ఇవ‌న్నీ జ‌రిగే విష‌యాలో కావో తెలీదు గానీ `నిను వీడ‌ని నీడ‌ను నేనే` ప్రీ రిలీజ్ ఫంక్ష‌న్‌లో మాత్రం ఈ ముగ్గురూ ప్రామిస్ చేసుకున్నారు. “సందీప్ మా అంద‌రికీ చాలా స్ఫూర్తి ఇచ్చాడు. ఒక‌ట్రెండు ఫ్లాపులు నాకొస్తే.. నేను డిప్రెష‌న్‌లోకి వెళ్లిపోతాను. కానీ సందీప్ అందులోంచి బ‌య‌ట‌కు వ‌చ్చి ఓ సాహ‌సోపేత‌మైన అడుగు వేశాడు. నాకెప్పుడైనా వ‌రుస ఫ్లాపులు వ‌స్తే సందీప్‌ని గుర్తు చేసుకుంటాను. త‌న ప్రొడ‌క్ష‌న్‌లో నాకో సినిమా చేయాల‌నివుంది“ అన్నాడు సుధీర్ బాబు. వెంట‌నే మైకు అందుకున్న సందీప్ ”సుధీర్ నిర్మాత‌గా నేనో సినిమా చేస్తా.. నా బ్యాన‌ర్‌లో సుధీర్ చేస్తాడు” అని కొన‌సాగించాడు. వీరిద్ద‌రి మ‌ధ్య‌లో వ‌చ్చి నిఖిల్ ”మీ ఇద్ద‌రి బ్యాన‌ర్‌లో నేను ఫ్రీగా చేస్తా” అని చెప్పేశాడు. మొత్తానికి యువ హీరోల మ‌ధ్య ఐక‌మ‌త్యానికి ఈ వేడుక మ‌రోసారి సాక్షిగా నిలిచింది. నిజంగా ఈ కాంబినేష‌న్ వ‌స్తే బాగుంటుంది క‌దా?