కమెడియన్ ఫృధ్వీ ఇప్పుడు.. సీరియస్ పొలిటిషియన్‌గా మారారు. మామూలుగా అయన కమెడియన్ కాబట్టి… ఏం చెప్పినా.. కామెడీగానే తీసుకుంటారు. కానీ.. ఆయన మాత్రం.. చాలా సీరియస్‌గా రాజకీయం చేశారు. వైఎస్ఆర్ కాంగ్రెస్ పార్టీ కోసం పని చేశారు. నిజానికి ఆయన ఆ పార్టీ కోసం పని చేయడం అంటే.. జగన్మోహన్ రెడ్డిని పొగడటం కాదు.. ఇతర పార్టీల నేతల్ని.. నోటికొచ్చినట్లు తిట్టడమే. జగన్‌ను ఒక్కసారి పొగిడితే.. వచ్చే మైలేజీ కన్నా… ఇతర పార్టీల నేతల్ని.. తిడితే వచ్చే మైలేజీ వేరు. అది సొంత పార్టీలో కూడా గుర్తింపు తెస్తుంది. అందుకే.. చాలా ప్లాన్డ్ గా అదే వ్యూహం అమలు చేశారు. అయితే.. ఆయన సీరియస్ గా పొలిటిషియన్లను తిడితే.. సైజుకు మించి అవుతుందని అనుకుంటారని భయపడ్డారేమో కానీ.. ఇప్పుడు… కేవలం టాలీవుడ్‌నే టార్గెట్ చేస్తున్నారు. ఎస్వీబీసీ చైర్మన్ అయ్యాక.. పూర్తిగా టాలీవుడ్‌పైనే విమర్శలు గుప్పిస్తున్నారు.
వైఎస్ఆర్ కాంగ్రెస్ పార్టీకి చురుగ్గా ప్రచారం చేసేసిన తర్వాత.. ఆ పార్టీ గెలిచిన తర్వాత.. ఫృధ్వీ కొన్నాళ్లు ఖాళీగా ఉన్నారు. అటు పార్టీ పట్టించుకోలేదు. ఇటు టాలీవుడ్ కూడా.. ఆయన రాజకీయాల్లో బిజీ అని.. వేరే ఆప్షన్స్ వెదుక్కున్నారు. దాంతో.. సమయం మించిపోతుందేమోనని… టాలీవుడ్‌ను టార్గెట్ చేసి…జగన్‌ను మెప్పించే ప్రయత్నం చేశారు. జగన్ సీఎం కావడం.. టాలీవుడ్‌కి ఇష్టం లేదన్నట్లుగా కామెంట్లు చేశారు. సినీ పెద్దలపై అభ్యంతరకమైన వ్యాఖ్యలు చేశారు. తనకు చాన్సులు రావడం లేదని.. చెప్పుకున్నారు. ఫృధ్వీ బాధ.. వైసీపీ హైకమాండ్‌కు వెంటనే తెలిసింది.. ఎస్వీబీసీ చైర్మన్ పదవి ఇచ్చింది. దాంతో ఆయన.. తన ఎటాక్‌ను మరింత పెంచారు.
టాలీవుడ్‌లో తాను ఎవరి దయాదాక్షిణ్యాలతో బతకలేదని… అంత తన ప్రతిభతోనే పైకి వచ్చానని చెప్పుకున్న ఆయన… తన అవకాశాలను ఎవరూ తగ్గించలేరని… ఎస్వీబీసీ చైర్మన్ పదవి పొందిన మొదట్లో మీడియాకు గొప్పగా చెప్పారు. కానీ ఇప్పుడు మాత్రం.. మాట మార్చేశారు. తనకు అవకాశాలు రాకుండా చేస్తున్నారని… ఆరోపించేస్తున్నారు. గతంలో అడ్వాన్సులు ఇచ్చిన వాళ్లు కూడా వెనక్కి తీసుకుంటున్నారట. దీని వెనుక రాజకీయ కుట్ర ఉందని అంటున్నారు. నిజానికి అధికార పార్టీ లో ఉంటూ… ఇలా చెప్పడం..అతిశయోక్తే. కానీ.. ఇలా .. ఫృధ్వీ.. ఆరోపణలు చేయడానికి .. మరో కారణం ఉందంటున్నారు. తాను వైసీపీ కోసం పని చేసి .. సినీ కెరీర్‌ను కోల్పోయానని.. ఎస్వీబీసీ చైర్మన్ కంటే పెద్ద పదవి ఏదో ఆయన కోరుకుంటున్నారన్న ప్రచారం వైసీపీ వర్గాల్లో జరుగుతోంది. మరి జగన్ ఆలకిస్తారో లేదో..?
