ఆంధ్రప్రదేశ్ బిజెపి అధ్యక్షుడు కన్నా లక్ష్మీనారాయణ జగన్ పై హత్య కేసు నమోదు చేయాలని సంచలన వ్యాఖ్యలు చేశారు. వివరాల్లోకి వెళితే..

గతంలో తెలుగుదేశం పార్టీ హయాంలో పడవ ప్రమాదాలు జరిగినప్పుడు, చంద్రబాబు మీద హత్య కేసు నమోదు చేయాలని వైఎస్ జగన్ వ్యాఖ్యానించిన సంగతి తెలిసిందే. వరుసగా బోటు ప్రమాదాలు జరుగుతూ ఉంటే రాష్ట్ర ప్రభుత్వం చర్యలు తీసుకోకుండా నిద్ర పోతుందా అంటూ జగన్ తీవ్ర స్వరంతో విరుచుకుపడిన సంగతి గుర్తుండే ఉంటుంది. ఆ సందర్భంలో వైఎస్ఆర్ కాంగ్రెస్ పార్టీ అధికార హ్యాండిల్ నుంచి, చంద్రబాబు పై హత్య కేసు నమోదు చేయాలని జగన్ వ్యాఖ్యానించినట్లు ట్వీట్ కూడా చేశారు.

అయితే ఇప్పుడు ఆంధ్రప్రదేశ్ లో మళ్లీ అదే తరహా బోటు ప్రమాదం జరిగింది. ఇప్పుడు కూడా అదే అవినీతి, అదే నిర్లక్ష్యం కారణంగానే ప్రజల ప్రాణాలు గాలిలో కలిసిపోయాయి. దీనిపై కన్నా లక్ష్మీనారాయణ స్పందిస్తూ, గతంలో చంద్రబాబు మీద హత్య కేసు పెట్టాలన్న వైఎస్ఆర్సిపి ట్వీట్ ని కూడా జత‌ చేస్తూ, “మీ ప్రభుత్వం వైఫల్యం వల్లే పడవ ప్రమాదం జరిగింది.. మీ పైన కూడా హత్యా కేసు నమోదు చెయ్యాలి.. మీ ప్రభుత్వం ఈ దారుణానికి ఖచ్చితంగా నైతికంగా బాధ్యత తీసుకోవాలి.. దీనికి ఏమంటారు జగన్ గారు ?” – అంటూ ట్వీట్ చేశారు. అప్పట్లో పడవ ప్రమాదాలకు చంద్రబాబు ప్రభుత్వం కారణం కాబట్టి ముఖ్యమంత్రి చంద్రబాబు మీద హత్య కేసు నమోదు చేయాలనే జగన్ వాదన సరైనదైతే, ఇప్పుడు అదే లాజిక్ ప్రకారం ముఖ్యమంత్రి జగన్ పై హత్య కేసు నమోదు చేయాల్సి ఉంటుందని తటస్థులు కూడా అభిప్రాయపడుతున్నారు.

బిజెపి నేతలు ఎన్ని విమర్శలు చేసినప్పటికీ, వారి విమర్శలు తిప్పికొట్టే సాహసం చేయడానికి వెనకాడుతున్న వైఎస్ఆర్ సీపీ నేతలు, మరి ఈసారైనా కన్నా లక్ష్మీనారాయణ వ్యాఖ్యల మీద స్పందిస్తారా అన్నది వేచి చూడాలి.