సైరాలో బిగ్ బీ న‌టించిన సంగ‌తి తెలిసిందే. ఉయ్యాల‌వాడ న‌ర‌సింహారెడ్డి గురువుగా అమితాబ్ క‌నిపించారు. బిగ్ బీ లాంటి న‌టుడ్ని తెలుగు ప‌రిశ్ర‌మ‌కు తీసుకురావ‌డం నిజంగా ఓ అద్భుత‌మే. ఇది వ‌ర‌కు చాలామంది బిగ్ బీతో ఓ పాత్ర చేయించాల‌ని ప్ర‌య‌త్నించారు. అంతెందుకు… బాల‌య్య – కృష్ణ‌వంశీల `రైతు`లో ఓకీల‌క పాత్ర కోసం అమితాబ్ బ‌చ్చ‌న్ ని సంప్ర‌దిస్తే… బిగ్ బీ సున్నితంగా తిర‌స్క‌రించారు. అలాంటిది.. సైరాలో బిగ్ బీ న‌టించ‌డం ఓ ప్ర‌ధాన ఆక‌ర్ష‌ణ అయ్యింది.
సాధార‌ణంగా చిన్న పాత్ర అయినా స‌రే, అమితాబ్ బ‌చ్చ‌న్ పారితోషికం కోట్ల రూపాయ‌ల్లో ఉంటుంది. కానీ ‘ఒక్క రూపాయి కూడా తీసుకోకుండా అమితాబ్ బ‌చ్చ‌న్ ఈ సినిమాలో న‌టించారు’ అని చిరంజీవి ప‌దే ప‌దే చెబుతున్నారు. నిజానికి అమితాబ్ `నాకు పారితోషికం వ‌ద్దు` అనే చెప్పారు. కానీ చిరు మాత్రం అమితాబ్ బి భారీ మొత్తంలో పారితోషికాన్ని బ‌ల‌వంతంగా ఇచ్చిన‌ట్టు తెలుస్తోంది. ఆ పారితోషికం రూ.5 కోట్లకు పైమాటే అని టాక్‌. అయితే అది పారితోషికంలా కాకుండా.. ఓ గిఫ్ట్‌లా ఇచ్చిన‌ట్టు ఇన్‌సైడ్ వ‌ర్గాల టాక్‌. అనుష్క కూడా ఓ చిన్న పాత్ర‌లో క‌నిపించిన సంగ‌తి తెలిసిందే. త‌న‌కు కూడా ఖరీదైన బ‌హుమ‌తి ఇవ్వాల‌ని చ‌ర‌ణ్ నిర్ణ‌యించిన‌ట్టు స‌మాచారం. చిరంజీవి క‌ల‌ల చిత్రంలో న‌టించ‌డానికి ముందుకొచ్చిన ఈ ఇద్ద‌రికీ… చ‌ర‌ణ్ త‌గిన రీతిలోనే స‌త్క‌రించాడ‌న్న‌మాట.
