చిరంజీవి 152వ సినిమాలో క‌థానాయిక‌గా త్రిష పేరు దాదాపుగా ఖాయ‌మైపోయింది. న‌య‌న‌తార, అనుష్క, త‌మ‌న్నా లాంటి పేర్లు ప‌రిశీల‌న‌కు వ‌చ్చినా – కొర‌టాల మాత్రం త్రిష వైపుకు మొగ్గు చూపిన‌ట్టు తెలుస్తోంది. న‌య‌న ఇది వ‌ర‌కే చిరుతో జోడీ కట్టింది. పైగా న‌య‌న కాల్షీట్లు దొర‌క‌డం చాలా క‌ష్టం. పారితోషికం కూడా బాగా డిమాండ్ చేస్తోంది. ఇక త‌మ‌న్నా ఇప్ప‌టికే `సైరా`లో చిరు ప‌క్క‌న క‌నిపించింది. అనుష్క కాల్షీట్ల కోసం కొంత కాలం ఎదురుచూడాల్సిన ప‌రిస్థితి వ‌స్తోంది. ఈ ద‌శ‌లో త్రిష అయితే అన్ని విధాలుగా బాగుంటుంద‌ని కొర‌టాల భావిస్తున్నాడు.
అయితే చిరు – త్రిష అన‌గానే ‘స్టాలిన్’ గుర్తొస్తుంది. అందులో చిరు బాగా లావుగా, త్రిష మ‌రీ స‌న్న‌గా క‌నిపించింది. చిరు జోడీల్లో కాస్త ఇబ్బందిగా క‌నిపించిన సంద‌ర్భం ఇదే. అప్ప‌టికీ ఇప్ప‌టికీ ప‌రిస్థితుల్లో పెద్ద‌గా మార్పేమీ రాలేదు. చిరు అలానే లావుగా ఉంటే, త్రిష మ‌రింత స‌న్న‌బ‌డింది. సో.. ఇప్ప‌టికీ ఈ కాంబో ఆర్డ్ గానే ఉంటుంది. కానీ కొర‌టాల శివ ముందు మ‌రో ఆప్ష‌న్ లేకుండా పోయింది. చిరంజీవికి క‌థానాయిక‌గా త్రిష‌ని ఎంపిక చేసుకోవ‌డం అంత‌గా ఇష్టం లేద‌ని, అయితే కొర‌టాల నిర్ణ‌యాన్ని చిరు గౌర‌వించ‌డం వ‌ల్ల ఈ కాంబో మ‌రోసారి తెర‌పైకి రాబోతోంద‌ని స‌న్నిహిత వ‌ర్గాలు తెలిపాయి. మ‌రి ఈసారి.. ఈ కాంబినేష‌న్ ఎలా ఉంటుందో?
