తమిళ ద‌ర్శ‌కులంటే మ‌న‌వాళ్ల‌కు ప్ర‌త్యేక‌మైన అభిమానం. మురుగ‌దాస్ లాంటి వాళ్ల‌కు ఎర్ర తివాచీలు ప‌రుస్తుంటారిక్క‌డ‌. ఇప్పుడు ఈ జాబితాలో అట్లీ పేరు చేరింది. వ‌య‌సు చిన్న‌దైనా, పెద్ద హిట్లు కొట్టి మ‌న హీరోల దృష్టిలో ప‌డిపోయాడు అట్లీ. ఇప్పుడు విజ‌య్‌తో `విజిల్` కొట్టిస్తున్నాడు. ఆ వెంట‌నే షారుఖ్ ఖాన్‌తో ఓ సినిమా చేయ‌బోతున్నాడు. ఎన్టీఆర్‌తో అట్లీ ఓ సినిమా చేస్తాడ‌ని గ‌తంలో ప్ర‌చారం జ‌రిగింది. అయితే షారుఖ్ సినిమా వ‌చ్చేస‌రికి, ఎన్టీఆర్ తో ప్రాజెక్టు పెండింగ్‌లో ప‌డిపోయిన‌ట్టైంది. ఈ కాంబో ఉంటుందా, లేదా? అనే డౌట్ల‌ని అట్లీ ప‌టాపంచ‌లు చేశాడు. ఎన్టీఆర్‌తో సినిమా ఉంటుంద‌న్న సంకేతాలు గ‌ట్టిగానే ఇచ్చాడు.

విజిల్ ప్ర‌చారం కోసం హైద‌రాబాద్ వ‌చ్చాడు అట్లీ. ఈ సంద‌ర్భంగా ఎన్టీఆర్ టాపిక్ వ‌చ్చింది. ఎన్టీఆర్ ఇచ్చే ప్రోత్సాహం అంతా ఇంతా కాద‌ని, త‌న నుంచి ఓ సినిమా వ‌స్తోందంటే, ఎన్టీఆర్ ఫో్న్ చేసి మ‌రీ అభినందిస్తుంటాడ‌ని, త‌న‌కోస‌మైనా తెలుగులో ఓ సినిమా చేయాల‌ని అనుకుంటున్నాన‌ని చెప్పుకొచ్చాడు అట్లీ. త‌న మాట‌లు వింటుంటే.. ఎన్టీఆర్‌తో త‌ర‌చూ ట‌చ్‌లో ఉన్న‌ట్టే క‌నిపిస్తోంది. అంతేకాదు… తెలుగులో తాను సినిమా చేస్తే అది ఎన్టీఆర్‌తోనేన‌ని, అయితే.. అదెప్పుడో తాను కూడా చెప్ప‌లేన‌ని, అతి త్వ‌ర‌లో ఉంటుంద‌న్న న‌మ్మ‌కం మాత్రం ఉంద‌ని చెప్పుకొచ్చాడు. ఎన్టీఆర్ ప్ర‌స్తుతం `ఆర్‌.ఆర్‌.ఆర్‌`తో బిజీగా ఉన్నాడు. అది పూర్త‌య్యేలోగా అట్లీ షారుఖ్ సినిమా ముగించుకుంటే.. ఆ వెంట‌నే ఈ కాంబో చూసేయొచ్చు.