‘అః’తో నిర్మాత‌గా త‌న తొలి ప్ర‌య‌త్నాన్ని విజ‌య‌వంతంగా ప్రారంభించాడు నాని. వాల్ పోస్ట‌ర్ సినిమా ప‌తాకంపై ఇప్పుడు త‌న రెండో చిత్రాన్ని ప్ర‌క‌టించాడు. ఇందులో విశ్వ‌క్ సేన్ క‌థానాయ‌కుడిగా న‌టిస్తారు. శైలేష్ ద‌ర్శ‌కుడు. ఈ చిత్రానికి ‘హిట్‌’ అనే పేరు ఖ‌రారు చేశారు. ‘ద ఫ‌స్ట్ కేస్‌’ అనేది ఉప‌శీర్షిక‌. రుహానీ శ‌ర్మ క‌థానాయిక‌గా న‌టిస్తుంది. వివేక్ సాగ‌ర్ సంగీతం అందిస్తారు. ఇదో స‌స్పెన్స్ థ్రిల్ల‌ర్‌. మ‌ర్డ‌ర్ మిస్ట‌రీ నేప‌థ్యంలో సాగుతుంద‌ని స‌మాచారం. ‘ఈ న‌గ‌రానికి ఏమైంది’, ‘ఫ‌ల‌క్‌నామాదాస్’ సినిమాల‌తో క‌థానాయ‌కుడిగా గుర్తింపు తెచ్చుకున్నాడు విశ్వ‌క్ సేన్‌. ‘ఫ‌ల‌క్‌నామాదాస్‌’ చూశాకే… నాని త‌న సినిమాలో హీరోగా విశ్వ‌క్‌సేన్‌ని ఎంపిక చేసుకున్నాడు. త్వ‌ర‌లోనే ఈ సినిమా సెట్స్‌పైకి వెళ్ల‌నుంది.