దాదాపు ఓ పుష్క‌రం అయ్యింది విజ‌య‌శాంతిని వెండి తెర‌పై చూసి. రాజ‌కీయాల్లో బిజీగా ఉండి, సినిమాల‌వైపు దృష్టి సారించ‌లేక‌పోయింది. ఎన్ని ఆఫ‌ర్లు వ‌చ్చినా – విజ‌య‌శాంతి క‌ర‌గ‌లేదు. క‌ద‌ల‌లేదు. కానీ… ‘స‌రిలేరు నీకెవ్వ‌రు’ కోసం మాత్రం మ‌ళ్లీ రంగంలోకి దిగింది. ‘స‌రిలేరు..’లో విజ‌య‌శాంతి న‌టిస్తుంద‌ని తెలియ‌గానే ఈ సినిమాకి ఓ కొత్త లుక్‌, ఓ కొత్త క‌ల‌ర్ వ‌చ్చింది. విజ‌య‌శాంతి పాత్ర ఎలా ఉంటుంది? తెర‌పై ఎలా క‌నిపిస్తుంది? ఆమె లుక్ ఎలా ఉంటుంది? అనే ఆస‌క్తి నెల‌కొంది. ఇప్పుడు విజ‌య‌శాంతి లుక్ కూడా బ‌య‌ట‌కు వ‌చ్చేసింది. ఈ సినిమాలో భార‌తి పాత్ర‌లో ఆమె క‌నిపించ‌బోతున్నారు. లుక్ చాలా కూల్‌గా, హుందాగా ఉంది. ప‌ద‌మూడేళ్ల క్రితం విజ‌య‌శాంతిని ఎలా చూశామో, అంత‌కంటే ఛార్మింగ్‌గా ఆమె లుక్ ని డిజైన్ చేశారు. ‘బాహుబ‌లి’ త‌ర‌వాత హుందాగా ఉండే పాత్ర‌ల‌కు ర‌మ్య‌కృష్ణ పేరు ఎక్కువ‌గా ప‌రిశీలించ‌డం మొద‌లెట్టారు. న‌దియా లాంటివాళ్లు ఒక‌ట్రెండు సినిమాల‌కు వ‌చ్చి వెళ్లారు. విజ‌య‌శాంతి గ‌నుక‌… ఓకే అంటే ఇప్పుడు ఆ త‌ర‌హా పాత్ర‌ల‌న్నీ ఆమె ముందు క్యూ క‌ట్ట‌డం ఖాయంగా క‌నిపిస్తోంది. ఈ సినిమా వ‌ల్ల విజ‌య‌శాంతికి ఎంత ప్ల‌స్సో తెలీదు గానీ, విజ‌య శాంతి వ‌ల్ల మాత్రం ‘స‌రిలేరు నీకెవ్వ‌రు’కి నిజంగా ప్ల‌స్సే!