ప‌వ‌న్ క‌ల్యాణ్ రీ ఎంట్రీ ప‌నుల‌న్నీ చ‌క‌చ‌క జ‌రుగుతున్నాయి. ప‌వ‌న్ ఎవ‌రి క‌థ ఒప్పుకుంటాడో తెలీదుగానీ, ప్ర‌స్తుతానికైతే వైవిధ్య‌భ‌రిత‌మైన క‌థ‌లు ప‌వ‌న్ కోసం త‌యారు అవుతున్నాయి. `పింక్‌` రీమేక్ లేదంటే క్రిష్ సినిమా.. ఈ రెండిటిలో ఏదోటి ప‌ట్టాలెక్కే అవ‌కాశాలు పుష్క‌లంగా ఉన్నాయి. `పింక్‌` క‌థ గురించి అంద‌రికీ తెలిసిందే. మ‌రి క్రిష్ రాసుకుంటున్న స్క్రిప్టు దేని గురించి? ఎలాంటి జోన‌ర్‌లో ఈ సినిమా ఉండ‌బోతోంది?

వీటికి సంబంధించిన ఎక్స్‌క్లూజీవ్ విష‌యాలు తెలుగు 360 సేక‌రించింది.

క్రిష్ ఎప్పుడూ సామాజిక కోణంలోంచే క‌థ‌లు ఆలోచిస్తుంటాడు. సోష‌ల్ ఎలిమెంట్స్ ఎక్కువ‌గా క‌నిపిస్తాయి. ఏదో ఓ స‌మ‌స్య నుంచి త‌న క‌థ పుడుతుంది. క్రిష్ ప‌వ‌న్‌తో సినిమా చేస్తున్నాడు అన‌గానే ఇది కూడా సోష‌ల్ ఇష్యూ చుట్టూనే న‌డుస్తుంద‌నుకున్నారు. కానీ ఈసారి ప‌వ‌న్ కోసం ఓ జానపద క‌థ‌ని ఎంచుకున్నాడ‌ని తెలుస్తోంది. వంద‌ల ఏళ్ల క్రితం జ‌రిగిన ఓ సంఘ‌ట‌న‌ని ఓ క‌థ‌గా రాసుకుని, అందులో హీరోయిజాన్ని పుష్క‌లంగా మేళ‌వించాడ‌ట‌. చారిత్ర‌క అంశాలుంటూనే, జాన‌ప‌ద శైలిలో సాగిపోయే క‌మ‌ర్షియ‌ల్ సినిమా అని తెలుస్తోంది. ప‌వ‌న్ ఇప్ప‌టి వ‌ర‌కూ జాన‌ప‌ద క‌థ‌ల్లో క‌నిపించ‌లేదు. సో.. ప‌వ‌న్‌కీ ఇది కొత్త‌గా అనిపించే అంశ‌మే. అన్నీ కుదిరితే గ‌నుక‌.. ప‌వ‌న్‌ని త్వ‌ర‌లోనే జాన‌ప‌ద క‌థానాయ‌కుడిగా చూడొచ్చు.