కృష్ణ‌వంశీకి మంచి మ్యూజిక్ టేస్ట్ ఉంది. ఆయ‌న సినిమాలు ఫెయిల్ అయినా పాట‌లు బాగుంటాయి. సంగీత ద‌ర్శ‌కుడు ఎవ‌రైనా స‌రే, కృష్ణ‌వంశీ మార్క్ క‌నిపిస్తుంది. ఆయ‌న పాట‌ల్ని తెర‌కెక్కించే తీరు కూడా విభిన్నంగా ఉంటుంది. అలాంటి ద‌ర్శ‌కుడికి స్వ‌ర‌జ్ఞాని ఇళ‌య‌రాజా తోడైతే ఎలా ఉంటుందో ప్ర‌త్యేకంగా చెప్పాలా? ‘అంతఃపురం’ చూస్తే అర్థ‌మైపోతుంది. ఆ సినిమా హిట్టు. పాట‌లు ఇంకా పెద్ద హిట్టు. ‘అస‌లేం గుర్తుకురాదు.. నా క‌న్నుల ముందర నీవుండ‌గా’ పాటైతే ఇప్ప‌టికీ వినిపిస్తుంటుంది. గొప్ప మెలోడీ అది.

ఆ సినిమా వ‌చ్చి చాలా కాలం అయ్యింది. ఆ త‌ర‌వాత ఇళ‌య‌రాజా – కృష్ణ‌వంశీ మ‌ళ్లీ ప‌నిచేయ‌లేదు. ఇప్పుడు మ‌రోసారి వీరిద్ద‌రూ జ‌ట్టు క‌ట్టారు. ‘రంగ మార్తాండ‌’ కోసం. మ‌రాఠీలో విజ‌య‌వంత‌మైన ‘న‌ట సామ్రాట్‌’ సినిమాకి ఇది రీమేక్‌. ప్ర‌కాష్‌రాజ్ కీల‌క‌పాత్ర‌ధారి. ఇళ‌య‌రాజా సంగీతం అందిస్తున్నారు. మ్యూజిక్ సిట్టింగ్స్ మొద‌లైపోయాయి. ప్ర‌కాష్‌రాజ్ ఇళ‌య‌రాజాకి పెద్ద ఫ్యాన్‌. ప్ర‌కాష్ రాజ్ ద‌ర్శ‌క‌త్వం వ‌హించిన చిత్రాల‌కు ఇళ‌య‌రాజానే సంగీతం అందించారు. ఇప్పుడు ఈ ముగ్గురి కాంబినేష‌న్ ఇలా కుదిరింది. ఈ నెల‌లోనే ‘రంగ‌ మార్తాండ‌’ సెట్స్‌ పైకి వెళ్ల‌నుంది.