నాగార్జున మీడియా ఫ్రెండ్లీనే. ఎవ‌రేం ప్ర‌శ్న అడిగినా – స‌మాధానం ఇచ్చేస్తుంటారు. కొన్నికొన్ని ఇబ్బందిక‌ర‌మైన ప్ర‌శ్న‌లు త‌లెత్తితే – న‌వ్వుతూ స‌మాధానం దాటేస్తుంటారు. అలాంటి నాగార్జున‌కు సైతం కోపం వ‌చ్చింది. టీవీ9 యాంక‌ర్‌పై.
ఈరోజు ఉద‌యం హైద‌రాబాద్‌లోని అన్న‌పూర్ణ స్డూడియోస్‌లో ఏఎన్నార్ జాతీయ అవార్డుల ప్ర‌క‌ట‌న కార్య‌క్ర‌మం జ‌రిగింది. అక్కినేని అవార్డుని శ్రీ‌దేవి, రేఖ‌ల‌కు ప్ర‌క‌టించారు. ఇదే సంద‌ర్భంగా నాగార్జున‌ని ఇంట‌ర్వ్యూ చేయాల‌నుకుంది టీవీ9. యాంకర్ కూడా కెమెరా, మైకుతో రెడీ అయిపోయింది.
“మీ నాన్న‌గారు బిగ్ బాస్ హోస్‌లో ఉండి, మీరు హోస్ట్‌గా ఉంటే.. మీ రియాక్ష‌న్ ఏమిటి?” అనే ప్ర‌శ్న సంధించింది యాంకర్ భామ. ఇంట‌ర్వ్యూలో అదే తొలి ప్ర‌శ్న. అయితే ఈ ప్ర‌శ్న నాగార్జున‌కు న‌చ్చ‌లేదు. ‘లేని నాన్న‌గారిని బిగ్ బాస్ హోస్‌లోకి ఎందుకు లాగుతారు. ముందు కెమెరా మూసేయండి’ అంటూ కాస్త సీరియ‌స్‌గానే స‌మాధానం చెప్పేసరికి అక్క‌డికి వ‌చ్చిన యాంకర్ కూడా… కాస్త చిన్న‌బుచ్చుకుంది. ఆ త‌ర‌వాత యాంకర్, నాగ్ మ‌ధ్య కాస్త సంభాష‌ణ జ‌రిగింది. యాంకర్ `సారీ` కూడా చెప్పిన‌ట్టు స‌మాచారం. మొత్తానికి ఓ ఇంట‌ర్వ్యూ తొలి ప్ర‌శ్న ద‌గ్గ‌రే ఆగిపోయింది.
