ఈ సంగ‌తి మీకు తెలుసా..? చిరంజీవి మాతృమూర్తి అంజ‌నాదేవి అక్కినేని నాగేశ్వ‌ర‌రావుకి వీరాభిమాని. అక్కినేని సినిమా చూడ‌డం కోసం ఆమె చాలా పెద్ద సాహ‌స‌మే చేశారు. ఈ విష‌యాన్ని స్వ‌యంగా చిరంజీవి గుర్తు చేసుకున్నారు. ఏఎన్నార్ నేష‌న‌ల్ అవార్డు ప్ర‌దాన కార్య‌క్ర‌మం ఆదివారం సాయింత్రం హైద‌రాబాద్‌లోని అన్న‌పూర్ణ స్టూడియోస్‌లో ఘ‌నంగా జ‌రిగింది. రేఖ, బోనీకపూర్ (శ్రీ‌దేవి త‌ర‌పున) చిరంజీవి చేతుల మీదుగా అవార్డులు స్వీక‌రించారు. ఈ సందర్భంగా ఏఎన్నార్‌తో త‌న‌కున్న అనుబంధాన్ని గుర్తు చేసుకున్నారు చిరు. అంతేకాదు…త‌న త‌ల్లి ఏఎన్నార్‌కి వీరాభిమాని అని చెబుతూ ఓ సంఘ‌ట‌న క‌థ‌గా చెప్పి వినిపించారు.
“ఆరు ద‌శాబ్దాల క్రితం. ఓ ప‌ల్లెటూరులోని నిండు గ‌ర్భ‌వ‌తి. ప్ర‌స‌వానికి సిద్ధంగా ఉంది. అలాంట‌ప్పుడు పక్క టౌనులో త‌న అభిమాన క‌థానాయ‌కుడి సినిమా వచ్చింది. అది చూడాల‌న్న కోరిక‌ను భ‌ర్త ముందు వెలుబుచ్చింది. భార్య కోరిక కాద‌న‌కుండా ఆ భ‌ర్త ఓ జ‌ట్కా బండి పురమాయించి టౌనుకు బ‌య‌ల్దేరాడు. మ‌ధ్య‌లో చిన్న ప్ర‌మాదం కూడా జ‌రిగింది. భార్య‌కు చిన్న‌పాటి గాయాల‌య్యాయి. అయినా త‌ను గాయాల్ని లెక్క చేయ‌లేదు. `సినిమా చూసే ఇంటికి వెళ్తాం` అంది. భార్య కోరిక మేర‌కు ఆ భ‌ర్త సినిమా చూపించాడు. ఇంటికొచ్చాక భార్యా భ‌ర్త‌లిద్ద‌రూ ఆనందించారు. ఆ భార్యాభ‌ర్త‌లెవ‌రో కాదు.. మా అమ్మానాన్న‌లు. అప్పుడు క‌డుపులో ఉన్న బిడ్డ‌ను నేనే. వాళ్లు చూడాల‌నుకున్న సినిమాలో హీరో ఏఎన్నార్. మా అమ్మ ఆయ‌న‌కు వీరాభిమాని. క‌డుపులో ఉండ‌గానే న‌న్ను సినిమాకి తీసుకెళ్లింది. అలా సినిమాపై నాక్కూడా ప్రేమ పుట్టిందేమో” అన్నారు చిరంజీవి.
