టాలీవుడ్‌లో త‌యార‌వుతున్న మ‌రో మ‌ల్టీస్టార‌ర్ `వెంకీ మామ‌`. ఇద్ద‌రు హీరోలు క‌లిసి ఓ సినిమాలో న‌టిస్తేనే బోలెడంత సంద‌డి. ఆ హీరోలిద్ద‌రూ మామా అల్లుళ్ల‌యితే, తెర‌పైనా ఆ పాత్ర‌లే పోషిస్తుంటే ఇక చెప్పేదేముంది..? ఆ హుషారు మామూలుగా ఉండ‌దు. `వెంకీ మామ‌` టీజ‌ర్ లోనూ అదే క‌నిపించింది. బాబీ ద‌ర్శ‌క‌త్వం వ‌హించిన చిత్రమిది. రాశీఖ‌న్నా, పాయ‌ల్ రాజ్‌పుత్ క‌థానాయిక‌లు. ఈరోజు నాగ‌చైత‌న్య పుట్టిన రోజు సంద‌ర్భంగా టీజ‌ర్ విడుద‌ల చేశారు.

కెప్టెన్ కార్తీక్ శివ‌రామ్ వీర‌మాచినేని పాత్ర‌లో నాగ‌చైత‌న్య‌ని ప‌రిచ‌యం చేశారు. మామా అల్లుళ్ల అనుబంధం చూపిస్తూ స‌ర‌దాగా టీజ‌ర్ మొద‌లైంది. అల్లుడు మిల‌ట‌రీకి వెళ్తాడు. అక్క‌డ అనుకోని ప‌రిస్థితుల్లో చిక్కుకుంటే అల్లుడ్నిర‌క్షించ‌డానికి మామ రంగ‌ప్ర‌వేశం చేస్తాడు. ఆ త‌ర‌వాత ఏమైంద‌న్న‌ది క‌థ‌. వెంకీ అంటే అల్ల‌రి. టీజ‌ర్‌లో అది క‌నిపించింది. దాంతో పాటు హుందాద‌నం కూడా. స‌ర‌దాగా మొద‌లైన టీజ‌ర్ చివ‌రికి సీరియ‌స్‌లుక్‌లోకి వ‌చ్చేసింది. మామా అల్లుళ్ల అనుబంధాన్ని ఈ టీజ‌ర్ అద్దం ప‌ట్టింది. చైతూ – రాశీఖ‌న్నాల కెమిస్ట్రీ కంటే వెంకీ – చైతూల కెమిస్ట్రీనే అద్భుతంగా పండిన‌ట్టు అనిపిస్తోంది. ఈ సినిమాకి కావ‌ల్సింది కూడా అదే. ఈ డిసెంబ‌రులో ఈ చిత్రం ప్రేక్ష‌కుల ముందుకు రానుంది.